23 მარტს აფხაზეთის ავტონომიური რესპუბლიკის უმაღლესი საბჭოს თავმჯდომარე ელგუჯა გვაზავა, უმაღლესი საბჭოს დეპუტატები საქართველოში ევროკავშირის ელჩის მოადგილეს კარლო ნატალეს შეხვდნენ.

ელგუჯა გვაზავამ ევროკავშირის დელეგაციის წარმომადგენელს მიაწოდა ინფორმაცია აფხაზეთის უმაღლესი საბჭოს სტრუქტურული შემადგენლობის, ომამდე და ომის შემდეგ მისი იდეოლოგიურ-საკანონმდებლო საქმიანობის, დევნილობაში ფუნქციონირების თავისებურებების შესახებ.

შეხვედრაზე გააცნეს რა დოკუმენტური წყაროებით დადასტურებული აფხაზეთის ისტორიისა და კულტურული მემკვიდრეობის ამსახველი ლიტერატურა, საერთაშორისო თანამეგობრობის ქვეყნებში მათი გავრცელების მნიშვნელობასაც გაუსვეს ხაზი, რაც უპირველესად მსოფლიოს წინაშე აფხაზეთის კონფლიქტის რეალური მიზეზებისა და შესაბამისად, რუსეთის აგრესიული პოლიტიკის ობიექტურად წარმოჩენას უწყობს ხელს.

კარლო ნატალემ მადლობა გადაუხადა უმაღლეს საბჭოს მოწვევისთვის და განაცხადა, რომ ევროკავშირი დეტალურად იცნობს აფხაზეთის პრობლემას და ტერიტორიული მთლიანობის აღდგენის საქმეში საქართველოს მხარდაჭერას უცხადებს. შეკითხვაზე - როგორია ევროკავშირის დამოკიდებულება ოკუპირებული აფხაზეთის ე.წ. ხელმძღვანელების ევროპის ქვეყნებში ვიზიტთან და იქ ღონისძიებების ჩატარებასთან დაკავშირებით, მან უპასუხა - „მიუხედავად აფხაზეთის დე-ფაქტო ხელისუფლების წარმომადგენელთა განცხადებისა, თითქოს დიპლომატიურ დონეზე ხდება ვიზიტები, ჩვენ ვაცხადებთ, რომ ეს არის ყალბი ინფორმაციის პროპაგანდის ინსცენირება და მისი პრევენცია ყოველთვის ადვილი არ არის. აფხაზეთი არის საქართველო და საქართველოს ტერიტორიული მთლიანობის ცნობა არის ხელშეუხებელი“. მან ასევე დეპუტატების არაერთ აქტუალურ შეკითხვას გასცა საინტერესო პასუხი. ოკუპირებულ აფხაზეთში ადამიანის უფლებების ტოტალურ დარღვევებთან დაკავშირებით მსჯელობისას შეხვედრის მონაწილეები შეეხნენ გიგა ოთხოზორიასა და არჩილ ტატუნაშვილის შემზარავი მკვლელობის ფაქტებს.