პერსონალურ მონაცემთა დაცვის ინსპექტორმა, თამარ ქალდანმა იურიდიულ საკითხთა კომიტეტის სხდომაზე, გაწეული საქმიანობის თაობაზე, 2017 წლის ანგარიში წარმოადგინა.

მისი ინფორმაციით, საანგარიშო პერიოდში 2016 წელთან შედარებით, გაიზარდა როგორც ჩატარებული ინსპექტირებებისა და გამოვლენილი სამართალდარღვევების, ასევე მოქალაქეთა მომართვიანობის რაოდენობა. სამსახურის ხელმძღვანელმა კომიტეტის წევრებს სტატისტუკური მონაცემებიც გააცნო და აღნიშნა, რომ 2017 წელს შესწავლილი იქნა 385 საქმე, საიდანაც 274 სამართალდარღვევა გამოვლინდა.

„145 ფაქტზე ორგანიზაციებს დაეკისრათ ჯარიმა, გაიცა 53 გაფრთხილება, სავალდებულოდ შესასრულებელი 270 დავალება და რეკომენდაცია. 11 საქმე გადაეცა სხვადასხვა უწყებას რეაგირებისთვის და შესასწავლად, მათ შორის, დანაშაულის ნიშნების არსებობის გამო. გაზრდილია გაწეული კონსულტაციების რაოდენობა და მოქალაქეთა აქტიურობაც. 4800-ზე მეტი კონსულტაციიდან, რომელიც ორგანიზაციებისა და მოქალაქეებისთვის გაიცა, ნახევარი სწორედ მოქალაქეებზე მოდიოდა. გაუმჯობესებულია ორგანიზაციების ინფორმირების დონეც. გასულ წლებთან შედარებით, პროგრესია მონაცემთა დამუშავების საფუძვლების იდენტიფიცირებისა და შენახვის ვადების თვალსაზრისით“, - განაცხადა თამარ ქალდანმა.

მისივე ინფორმაციით, ინსპექტორის აპარატმა კერძო ორგანიზაციებს 1500 -ზე მეტი ზეპირი და წერილობითი კონსულტაცია გაუწია, რის შედეგადაც შესაძლებელი გახდა კანონმდებლობით განსაზღვრული ვალდებულებების შესრულება და შესაძლო სამართალდარღვევების თავიდან აცილება. „რაც შეეხება საჯარო ორგანიზაციებს, ინსპექტორმა მონაცემთა დამუშავების, მათ შორის, შეგროვების, გამოყენების, გამჟღავნების, მესამე პირებისათვის გადაცემის 115 ფაქტი შეისწავლა. საჯარო უწყებებს აპარატმა გაუწია 900-ზე მეტი ზეპირი და წერილობითი კონსულტაცია“, - აღნიშნა სამსახურის ხელმძღვანელმა.

მისივე განცხადებით, საანგარიშო პერიოდში ვიდეოთვალთვალის წესების დარღვევის გამო, 25 ორგანიზაციას დაეკისრა შესაბამისი პასუხისმგებლობა ჯარიმისა და გაფრთხილების სახით. პირდაპირი მარკეტინგის განხორციელების წესების დარღვევის გამო ორგანიზაციები 23 შემთხვევაში დაჯარიმდნენ.

რიგით მეხუთე ანგარიშის წარდგენისას, პერსონალურ მონაცემთა დაცვის ინსპექტორმა საზოგადოების ცნობიერების ამაღლების მიზნით ჩატარებულ ღონისძიებებზე და კამპანიაზე ისაუბრა. მისივე განცხადებით, ევროკავშირისა და გაეროს განვითარების პროგრამის ხელშეწყობით შემუშავდა საზოგადოებასთან ურთიერთობის სტრატეგია და დაიწყო მუშაობა ახალ ვებგვერდზე, რომელიც ხელმისაწვდომი იქნება შეზღუდული შესაძლებლობების მქონე მოქალაქეებისთვის.