სანდრო ბრეგაძის თქმით, რუსთავი2-ის შენობასთან „ქართული მარშის“ მხრიდან ძალადობას ადგილი არ ქონია. აღნიშნული განცხადება სანდრო ბრეგაძემ სასამართლოში გააკეთა, სადაც რუსთავი2-ზე განხორციელებული თავდასხმის გამო დაკავებული ე.წ "ქართული მარშის" წევრების სასამართლო პროცესი იმართება, სადაც აღკვეთის ღონისძიებაზე უნდა იმსჯელონ:

„თუ გინებისთვის შეეფარდება ამ ახალგაზრდებს პატიმრობა, მაშინ უმაღლესი თანამდებობის პირები დიდი ხნის დაკავებულები უნდა იყვნენ. რუსთავი 2-თან ძალადობას არ ქონდა ადგილი, ქონდა ადგილი სამწუხარო ინციდენტს, მე რომ იქ ვყოფილიყავი ეს ინციდენტი არ მოხდებოდა“- განაცხადა ბრეგაძემ.

კითხვაზე განხორციელდა თუ არა მასზე ფიზიკური ძალადობა, სანდრო ბრეგაძემ უპასუხა, რომ მას მსგავსი განცხადება არ გაუკეთებია. საავადმყოფოს პერსონალის მიერ გაკეთებულ განცხადებაზე რომ სანდრო ბრეგაძე თავს კარგად გრძნობდა, თუმცა სამედიცინო დაწესებულებაში თავისი სურვილით რჩებოდა, სანდრო ბრეგაძემ განაცხადა რომ „ექიმები იყვნენ შეკრულები“

"მე მქონდა გულყრები. სამწუხაროდ, სპეციალურად, გარკვეულმა სამსახურებმა ყველაფერი იღონეს, რომ არასწორი ინფორმაცია გავრცელებულიყო. ამაში მე „რუსთავი 2“-ს არ ვადანაშაულებ. სამწუხაროდ, ექიმები არიან ხშირად შეკრულები. "- განაცხადა ბრეგაძემ.