„საქართველოს ხელისუფლება პირდაპირ ასრულებს კრემლის დავალებებს“ - ნინო კალანდაძე ჟენევის ფორმატსა და მორიგ გატაცებაზე

პოლიტიკა - 18:34, 22 Mar, 2018

1478

"ნაციონალური მოძრაობის" ერთ-ერთი ლიდერი ნინო კალანდაძე აცხადებს, რომ საქართველოს ხელისუფლება ჟენევის მოლაპარაკების წინ რუსეთის ხელისუფლების მიერ ნაკარნახებ პოლიტიკას ატარებს.

როგორც "ნაციონალური მოძრაობის" წევრმა "ნიუპოსტთან" საუბრისას აღნიშნა, საოკუპაციო რეჟიმის მიერ მოკლული არჩილ ტატუნაშვილის ცხედრით ვაჭრობაც და საქართველოს პრემიერ-მინისტრის მიერ ამ თემაზე გაკეთებული განცხადებაც ნიადაგის მომზადება იყო, რომ თვის ბოლოს დაგეგმილ ჟენევის შეხვედრაზე საქართველომ საოკუპაციო რეჟიმის წარმომადგენლები მხარედ აღიაროს.

"მაშინ როცა პარლამენტში ტატუნაშვილი-ოთხოზორიას რეზოლუციის ტექსტი იხილებოდა, ხელისუფლების წარმომადგენლები აცხადებდნენ, რომ დოკუმენტი პრინციპული უნდა ყოფილიყო და რუსეთის ქმედებები დაეგმოთ, საქართველოს პრემიერ-მინისტრმა სწორედ ტატუნაშვილის საკითხზე გააკეთა განცხადება, სადაც სიტყვა ოკუპანტიც კი არ ახსენა და სრულიად მოულოდნელად ისაუბრა "აფხაზებისა და ოსეთის შემორიგებაზე". მან რეზოლუციის ტექსტზე მსჯელობის პარალელურად, სპეციალური წერილით მიმართა ოკუპანტი ქვეყნის პრეზიდენტს, დახმარებოდა საქართველოს, რომ კონფლიქტის მოგვარება შევძლოთ და მოვახერხოთ, ურთიერთობის ნორმალიზება ჩვენს ოს და აფხაზ ხალხთან-ო. ეს ნიშნავს იმას, რომ საქართველოს ხელისუფლება პირდაპირ ასრულებს კრემლის დავალებებს.

ისიც საგულისხმოა, რომ აღნიშნული წერილის შემდეგ, გიორგი კვირიკაშვილმა ჟენევის ფორმატის ცვლილების აუცილებლობაზე ისაუბრა, რითაც მიანიშნა, რომ საქართველო ჟენევის ფორმატშიც კი, რომელიც ერთადერთი საერთაშორისო ფორმატია, სადაც რუსეთი მხარედ არის აღიარებული, მზად არის პირდაპირ დიალოგში შევიდეს აფხაზეთთან და ოსეთთან, ანუ მხარედ ვაღიაროთ არა ოკუპანტი, რომელიც ამ პრობლემის სათავეში დგას, არამედ თანაბარ მოწინააღმდეგედ განვიხილოთ საოკუპაციო რეჟიმების წარმომადგენლები"- განაცხადა ნინო კალანდაძემ.

კალანდაძე ამბობს რომ რუსი ოკუპანტების მიერ სოფელ აძვიდან საქართველოს მოქალაქეების გატაცება, რუსეთის პოლიტიკური ნაბიჯია, რომ ჟენევის მოლაპარაკებებზე სასურველი შედეგის მისაღებად საქართველოს ხელისუფლებასთან შანტაჟის ენით ისაუბროს.

"მას შემდეგ რაც ისინი (რუსი ოკუპანტები) ჩვენს მიერ ოკუპირებულ ტერიტორიაზე მოგვიკლავენ ჩვენს პატრიოტ მოქალაქეებს, გაიტაცებენ გარდაცვლილს და ამ ცხედრის დაბრუნებისთვის თხოვნით მიგვამართინებენ, რომ დაგვეხმარონ იმაში რაც მათი საქმეა, მაშინ რაღა გასაკვირია რომ ისინი ხელახლა გაიტაცებენ მოქალაქეებს. ეს ხომ რეალურად ეფექტური შანტაჟიც არ არის, ეს არის ძალიან კარგად აპრობიორებული გზა, რითაც ახლა რუსეთს უნდა საქართველოს ხელისუფლება აიძულოს ჟენევის მოლაპარაკებებზე აღიარონ საოკუპაციო რეჟიმები დამოუკიდებელ სუბიექტებად. სწორედ ამას ემსახურება ოკუპანტების მიერ სოფელ აძვიდან საქართველოს ორი მოქალაქის გატაცება"- თქვა კალანდაძემ.