"ტატუნაშვილზე სულ მახსენდებოდა „სტუმარ-მასპინძელი“ და ზვიადაური"- გიორგი მარგველაშვილი

პოლიტიკა - 20:16, 21 Mar, 2018

1874

ოკუპირებულ ტერიტორიაზე არჩილ ტატუნაშვილის მკვლელობის საკითხს პრეზიდენტი გადაცემა „პოლიტმეტრში“ გამოეხმაურა. გიორგი მარგველაშვილის თქმით არჩილ ტატუნაშვილი მას ზვიადაურს აგონებს. როგორც პრეზიდენტმა განაცხადა, მტრის მიზანი, რომ ტატუნაშვილის ცხედრის არგადმოცემით, საქართველოსთვის შეურაცხყოფა მიეყენებინა და საზოგადოებაში განხეთქილება გამოეწვია მიუღწეველი დარჩა:

„ჩვენ თითქოს გენეტიკურად მზად ვართ ასეთი ტრაგედიებისთვის, ტატუნაშვილზე რომ იყო საუბარი სულ მახსენდებოდა „სტუმარ-მასპინძელი“ ზვიადაური იქ არის სიმბოლო გაუტეხელი ქართველის, რომელიც იქ უნდა მოკლან, მტრის ტერიტორიაზე. ასეთი ქმედებები თითქოს გვაძლიერებს, იმიტომ რომ მთელი საზოგადოება შეიკრა, აქ არ იყო განსხვავება ჩვენში. არ იყო ცალკე ხელისუფლება და ცალკე ოპოზიცია. ყველანი ვიყავით გაერთიანებული ამ ტკივილში. ხალხი, რომელსაც ამხელა ტკივილი მიადგა არ იყო მარტო დატოვებული. ჩვენ გავძლიერდით ამ ერთიანობაში. მიზანი, რომელიც იყო დასახული ჩვენი მტრის მიერ, ნეშტის არ გადმოცემით მოეყენებინა ჩვენთვის მეტი ტკივილი, გარკეულწილად მცდელობა იყო რომ შეურაცხმყოფელი ყოფილიყო ეს ყველაფერი, მცდელობა იყო რომ ამას რაღაცა ძვრები გამოეწვია საზოგადოებაში. ჩემი აზრით ეს აბსოლუტურად არ გამოუვიდათ და ჩვენ ერთად ვგლოვობთ ჩვენი ქვეყნის საერთო ტკივილს.“- განაცხადა გიორგი მარგველშვილმა.