"რუსეთის მიერ ძალის არგამოყენების ვალდებულების აღება არ ხდება და რა ხეირი საქართველოს აქედან?"- კანდელაკი ჟენევის ფორმატში განსახილველ საკითხზე

პოლიტიკა - 15:44, 21 Mar, 2018

1393

„ევროპული საქართველოს“ წევრის გიორგი კანდელაკის თქმით, გაუგებარია რა სარგებელს მიიღებს საქართველო იმ ცვლილებებით, რომელიც შესაძლოა ჟენევის ფორმატში განხორციელდეს. ოპოზიციონერი დეპუტატის თქმით, აღნიშნულ საკითხთან დაკავშირებით განმარტებები საგარეო საქმეთა მინისტრმა და პრემიერმა უნდა გააკეთოს, სწორედ ამიტომ საპარლამენტო უმცირესობა ხელისუფლების მაღალჩინოსნებს საკანონმდებლო ორგანოში კიდევ ერთხელ იბარებს:

„ჟენევის მოლაპარაკებებში, საქართველოს მიზანი იყო, რომ რუსეთს აეღო ძალის არგამოყენების ვალდებულება. იმ ნაბიჯით, რაც გვახარა საგარეო საქმეთა მინისტრის მოადგილემ ასეთი ვალდებულების აღება არ ხდება. მაშინ კითხვა ისმის, რა ხეირი საქართველოს აქედან? რა თქმა უნდა აუცილებელია საგარეო საქმეთა მინისტრის მოსვლა, ჩვენ ის გვყავს დაბარებული პარლამენტში უმცირესობის ფორმატში და ის არ ასრულებს საკუთარ ვალდებულებას, როცა არ მოდის. ასევე ჩვენ მოვითხოვეთ პრემიერის მოსვლა, რადგან ჟენევის ფორმატში ცვლილებების ინიციატივა მას ეკუთვნის. მან უნდა გასცეს პარლამენტის წევრების კითხვებს პასუხი და გაიმართოს დისკუსია იმასთან დაკავშირებით, თუ რა საფრთხეებს შეიცავს ნებისმიერი ცვლილება ჟენევის მოლაპარაკებებში და ზოგადად როგორ უნდა მოხდეს საერთაშორისო პოლიტიკურ ასპარეზზე დეოკუპაციის, დევნილთა დაბრუნების და ტერიტორიული მთლიანობის აღდგენის საკითხის აქტუალიზაცია.“- განაცხადა გიორგი კანდელაკმა.