თბილისის საკრებულოს ფრაქცია „ნაციონალური მოძრაობის“ წევრი, ლევან ხაბეიშვილი თბილისის მთავარ სამმართველოში დაკითხვაზე იმყოფებოდა. ხაბეიშვილი თბილისის მერიის მიერ საახალწლო განათებების შესაძენად, მილანურ კომპანიასთან გაფორმებულ 3 მილიონიან ხელშეკრულებასთან დაკავშირებით გამოკითხეს.

თბილისის მთავარ სამმართველოს საკრებულოს ფრაქცია ”ნაციონალური მოძრაობის” წევრმა ყველა ის დოკუმენტი მიაწოდა, რომელიც, მისი თქმით, დედაქალაქის საახალწლო განათებისთვის ტენდერის გარეშე, ერთ პირთან მოლაპარაკების გზით გაფორმდა და შესაძლოა კორუფციის ნიშნები იკვეთებოდეს.

„გამოძიებამ გადაამოწმა ის ინფორმაცია, რომელიც პროკურატურაში შეტანილ განცხადებასთან თანდართულ დოკუმანტაციაში იყო. ასევე, დაადასტურეს ჩემთან საუბარში, რომ „თბილსერვის ჯგუფის“ ხელმძღვანელობაც გამოკითხულია ამ საქმესთან დაკავშირებით. იმედი მაქვს რომ საბოლოო ჯამში აღიძვრება სისხლის სამართლის საქმე ამასთან დაკაშირებით და კონკრეტული ადამიანები, რომლებმაც ბიუჯეტიდან გაფლანგეს თანხები, ადამიანები, რომლებმაც იშუამდგომლეს მილანურ კომპანიასთან იქნებიან დასჯილები. ყოველ შემთხვევაში გამომძიებლებთან გასაუბრების შემდეგ დამრჩა შთაბეჭდილება, რომ ისინი აპირებენ სისხლის სამართლის საქმის წარმოების დაწყებას.“- განაცხადა ლევან ხაბეიშვილმა.