ოკუპირებული ცხინვალის ციხეში გაურკვეველ ვითარებაში მოკლული არჩილ ტატუნაშვილის ცხედარი რამდენიმე წუთის წინ საქართველოს ხელისუფლების მიერ კონტროლირებად ტერიტორიაზე გადმოასვენეს.

შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა აღნიშნულზე კომენტარი გააკეთა:

„ამ წუთებში მოხდა არჩილ ტატუანშვილის ცხედრის გადმოცემა წითელი ჯვრის საერთაშორისო კომიტეტის მეშვეობით, პირველ რიგში ცხედარს ჩაუტარდება ექსპერტიზა ლევან სამხარაულის სასამართლო ექსპერტიზის ეროვნულ ბიუროში თბილისში და ამის შემდეგ მოხდება ცხედრის გადასვენება ოჯახში, სადაც მოლოდინი არის დიდი, ამ მძიმე წუთებში მნიშვნელოვანია ახლობლებს ჰქონდეთ მიცვალებულის დატირების საშუალება და ჩვენც, საზოგადოებასაც ჰქონდეს შესაძლებლობა, რომ ღირსეული პატივი მივაგოთ მას, ამ დროის განმავლობაში ყველა სახელმწიფო უწყება აქტიურად მუშაობდა, ამოქმედდა ყველა ბერკეტი რომ მოხერხებულიყო ცხედრის გადმოსვენება. ძალიან მნიშვნელოვანია, რომ ამ ტრაგიკული ფაქტის სათანადო გამოძიება მოხდეს“, - განაცხადა ქეთევან ციხელაშვილმა.