უვიზო მიმოსვლის შესახებ საინფორმაციო კამპანიის მესამე ტალღის ფარგლებში მოსახლეობასთან შეხვედრები თბილისშიც დაიწყო. საგარეო საქმეთა სამინისტროსა და სსიპ ნატოსა და ევროკავშირის შესახებ საინფორმაციო ცენტრის ორგანიზებით, საინფორმაციო შეხვედრები თბილისის უმაღლეს სასწავლო დაწესებულებებში, სტუდენტებთან მიმდინარეობს.

კამპანიის ფარგლებში, საგარეო საქმეთა სამინისტროსა და შინაგან საქმეთა სამინისტროს წარმომადგენლები სოხუმის სახელმწიფო უნივერსიტეტის სტუდენტებს შეხვდნენ.

შეხვედრაზე ყურადღება გამახვილდა უვიზო მიმოსვლის ფარგლებში გამოვლენილ იმ რისკებსა და შესაძლო საფრთხეებზე, რაც დაკავშირებულია, როგორც ამ წესების დარღვევასთან, ისე ევროკავშირის ქვეყნებში თავშესაფრის მიღების პროცედურების ბოროტად გამოყენებასთან.

კამპანიის ფარგლებში, დედაქალაქის პარალელურად შეხვედრები რეგიონებშიც მიმდინარეობს. შეხვედრები უკვე გაიმართა იმერეთისა და კახეთის რეგიონებში. სამეგრელოში, აჭარასა და სამცხე-ჯავახეთში კი საინფორმაციო ცენტრის წარმომადგენლები და ექსპერტები მოსახლეობის ინფორმირებას მიმდინარე კვირაში გააგრძელებენ.

საინფორმაციო კამპანია საგარეო საქმეთა სამინისტროსა და ნატოსა და ევროკავშირის შესახებ საინფორმაციო ცენტრის ორგანიზებით, სამოქალაქო სექტორთან თანამშრომლობითა და მიგრაციის პოლიტიკის განვითარების საერთაშორისო ცენტრის (ICMPD) მხარდაჭერით ხორციელდება.​