"ცალკეულ შემთხვევაში ეჭვი მაქვს რომ წახალისებულიც იყვნენ და ეს ძალიან სახიფათოა"- ლაფერაშვილი ე.წ "ქართული მარშის" მიერ განხორციელებულ თავდასხმაზე

პოლიტიკა - 18:34, 20 Mar, 2018

1442

რუსთავი2-ის ოფისზე ე.წ „ქართული მარშის“ მიერ განხორციელებულ თავდასხმას ტელეკომპანიის პროდიუსერი გიორგი ლაფერაშვილი გამოეხმაურა. ლაფერაშვილი შემაშფოთებელს უწოდებს მომხდარ ფაქტს და სიტყვის თავისუფლებისთვის შექმნილ საფრთხედ აფასებს. როგორც გიორგი ლაფერაშვილმა გამაცხადა განსაკუთრებით მნიშვნელოვანი და შემაშფოთებელია ის რომ ამ ადამიანებს ეძლევათ თავისუფლად მოქმედების საშუალება და არის ეჭვი, რომ ზოგჯერ წახალისებულიც იყვნენ:

„არავის აქვს უფლება, ასეთი მეთოდებით არჩიოს საქმეები ტელეკომპანიის წარმომადგენლებთან და ჟურნალისტებთან. ეს იყო რამდენიმე ნიშნის შემცველი დანაშაული, ქონების დაზიანებიდან დაწყებული, ძალიან ბევრი ნიშანი იკვეთება. თუმცა ყველაზე მნიშვნელოვანი და შემაშფოთებელი ამ ამბავში არის ის რომ ამ ადამიანებს ეძლევათ თავისუფლად მოქმედების საშუალება, ყოველ შემთხვევაში აქამდე ასე იყო , ცალკეულ შემთხვევაში ეჭვი მაქვს რომ წახალისებულიც იყვნენ, ეკეთებინათ ის რასაც აკეთებდნენ და ეს ძალიან სახიფათოა. სიტყვის გამოხატვის თავისუფლება არის ერთ-ერთი ყველაზე მნიშვნელოვანი ღირებულება, რასაც ემყარება ჩვენი სახელმწიფოებრიობა და ეს არავითარ შემთხვევაშია არ უნდა დაირღვეს.“- განაცხადა გიორგი ლაფერაშვილმა.

შეგახსენებთ, გუშინ რუსთავი2-ის ეზოში ქართულმა მარშმა საპროტესტო აქცია მოაწყო, მათ გადაადგილების საშუალება არ მისცეს ავტომობილს, რომელშიც არხის იურისტი თამთა მურადაშვილი და ჟურნალისტი გიორგი გაბუნია ისხდნენ. ისინი გაბუნიას ანგარიშსწორებით ემუქრებოდნენ იმ განცხადების გამო, რომელიც მან „P.S”-ში გააკეთა. მათი თქმით ჟურნალისტმა მათი „რელიგიური გრძნობები“ შეურაცხყო. ფიზიკური ძალადობა განხორციელდა რ2-ის სხვა ჟურნალისტებზეც, ერთ-ერთ მათგანს დავით ერაძეს მიღებული დაზიანებების გამო ჰოსპიტალიზაცია დასჭირდა.