რუსთავი2-ის ეზოში გუშინ განვითარებულ მოვლენებთან დაკავშირებით, საგამოძიებო ორგანოში რ2-ის ტელეწამყვანი გიორგი გაბუნია გამოკითხვაზე მივიდა. გაბუნიამ გამოკითხვაზე შესვლამდე კომენტარი მედიასთან გააკეთა და გუშინ მასზე განხორციელებული თავდასხმის დეტალები გაიხსენა. გაბუნიას თქმით, მას ავტომობილიდან გადმოთრევით და ფიზიკური ანგარიშსწორებით ემუქრებოდნენ:

„ჩვენ რომ ავდიოდით მეორე მანქანა მოდიოდა, რომელსაც გზა დავუთმეთ და აღმოჩნდა რომ სწორედ ამ მანქანაში იჯდა სადღობელაშვილი, რომელიც მოდიოდა და უნდა მიეღო მონაწილეობა აქციაში. მან დამინახა მე, გააჩერა მანქანა, მითხრა, რომ ზუსტად შენთან მოვდივარ სად მიდიხარო, გადმოვიდა მანქანიდან დაუძახა დანარჩენებს, რომლებიც უკვე შეკრებილები იყვნენ, უთხრა რომ ალყა შემოერტყათ მანქანისთვის, ეს არ იყო უბრალოდ რომ ალყაშემორტყმული ვიყავით და დაძვრის საშუალებას არ გვაძლევდნენ. ისინი იმუქრებოდნენ, იგინებოდნენ , იფურთხებოდნენ. მანქანას ურტყამდნენ ძალიან ძლიერად, ახტნენ „კაპოტზე“ , ამიტომაც არის თამთას მანქანა დაზიანებული. ურტყამდნენ ძალიან ძლიერად შუშას. იმუქრებოდნენ რომ გადმოგვათრევდნენ, გვცემდნენ და ასე შემდეგ. ვისთანაც ერთადაც ვიჯექი ავტომობილში, მას ჩვევა აქვს, რომ როგორც კი ჯდება ავტომატურად კეტავს კარს, თორემ უბრალოდ რომ კარი დაკეტილი არ ქონოდა, პირველი რაც ამ ადამიანებმა სცადეს იყო, რომ კარების გაღებას შეეცადნენ და ჩვენ გადმოთრევას მანქანიდან. აი მაგალითად, კარი რომ არ ყოფილიყო დაკეტილი, მე აქ ინტერვიუს ვერ მოგცემდით.“- განაცხადა გიორგი გაბუნიამ.

შეგახსენებთ, გუშინ რუსთავი2-ის ეზოში ქართულმა მარშმა საპროტესტო აქცია მოაწყო, მათ გადაადგილების საშუალება არ მისცეს ავტომობილს, რომელშიც არხის იურისტი თამთა მურადაშვილი და ჟურნალისტი გიორგი გაბუნია ისხდნენ. ისინი გაბუნიას ანგარიშსწორებით ემუქრებოდნენ იმ განცხადების გამო, რომელიც მან „P.S”-ში გააკეთა. მათი თქმით ჟურნალისტმა მათი „რელიგიური გრძნობები“ შეურაცხყო. ფიზიკური ძალადობა განხორციელდა რ2-ის სხვა ჟურნალისტებზეც, ერთ-ერთ მათგანს დავით ერაძეს მიღებული დაზიანებების გამო ჰოსპიტალიზაცია დასჭირდა.