ევროკავშირთან ასოცირების შეთანხმების ფარგლებში, საქართველომ აიღო ვალდებულება სანთებელების კონტროლი დაეწესებინა, რაც 2018 წლიდან ამოქმედდა. კერძოდ, დასაშვებია მხოლოდ ისეთი სანთებელას გაყიდვა, რომელიც დაპროექტებული და აწყობილია იმგვარად, რომ ჩვეულებრივი მოხმარების პირობებში შეუძლებელია მისი გამოყენება 51 თვეზე მცირე ასაკის (4.3 წელი) ბავშვის მიერ. ამ ვალდებულების შესრულებაზე კონტროლი კი დაევალა ტექნიკური და სამშენებლო ზედამხედველობის სააგენტოს, რომელმაც უნდა უზრუნველყოს ისეთი სანთებელების ბაზრიდან ამოღება, რომლებიც ზემოაღნიშნულ მოთხოვნას არ აკმაყოფილებენ. ინფორმაციას ამის შესახებ momxmarebeli.ge ავრცელებს.

„საქართველოს სტრატეგიული კვლევებისა და განვითარების ცენტრი“ აღნიშნულ რეგულაციას მიესალმება და აცხადებს, რომ ასეთი ზომები ხანძრის საშიშროებას შეამცირებს:

„საქართველოში გახშირებული ხანძრების ფონზე, ვფიქრობთ გამართლებულია ისეთი ზომის მიღება, რომლებიც ხანძრის საშიშროებას შეამცირებს. ასე რომ, თუ წააწყდებით ისეთ სანთებელას, რომელიც ადვილად არ ინთება, იცოდეთ, რომ ეს შეიძლება არა ტექნიკური წუნი იყოს, არამედ უსაფრთხოების ზომა. ამავე დროს, თუკი ნახავთ, რომ იყიდება ისეთი სანთებელა, რომლის ანთებაც მცირეწლოვან ბავშვს შეუძლია, ეს სავარაუდოდ, კანონდარღვევაა. გთხოვთ სამოქალაქო პასუხისმგებლობა გამოიჩინოთ და ასეთი ფაქტების შესახებ აცნობოთ ტექნიკური და სამშენებლო ზედამხედველობის სააგენტოს. ამით თქვენ საკუთარ თავსა და სხვებსაც ხანძრისაგან დაიცავთ.“ - ნათქვამია „საქართველოს სტრატეგიული კვლევებისა და განვითარების ცენტრის“ განცხადებაში.