აზარტულ თამაშებში ჩართულ პირებს შესაძლოა საჯარო სექტორში დასაქმება შეეზღუდოთ

პოლიტიკა - 15:33, 20 Mar, 2018

4179

საჯარო სექტორში დასაქმების მსურველებს, სხვადასხვა დოკუმენტაციასთან ერთად შესაძლოა იმ ცნობის წარდგენა მოუწიოთ, რომ აზარტულ თამაშებში არ არიან ჩართულნი. ამის შესახებ რადიო „პალიტრას“ გადაცემაში „საქმე“ უმრავლესობის დეპუტატმა ლევან გოგიჩაიშვილმა ისაუბრა. მისი თქმით ისევე როგორც ე.წ ნარკოლოგიური ცნობის, ასევე სავალდებულო უნდა იყოს შესაბამისი ცნობის წარდგენა იმის შესახებ, რომ საჯარო სექტორში დასაქმების მსურველი აზარტულ თამაშებში არ არის ჩართული:

„კანონპროექტი გულისხმობს მოთამაშეთა რეესტრის შექმნას და ნებისმიერ ადამიანს, რომელიც საქართველოში აზარტულ თამაშებს ითამაშებს ამ რეესტრში მოუწევს დარეგისტრირება. ვინც რ იქნება დარეგისტრირებული ის საქართველოს სივრცეში ლეგალურად ვერ ითამაშებს. სწორედ ამ რეესტრიდან მოუწევთ ცნობის წარდგენა საჯარო სექტორში დასაქმების მსურველებს. ვფიქრობ, ძალიან მნიშვნელოვანია, რომ ძალოვანი სტრუქტურის წარმომადგენლებისთვის, სამხედროებისთვის, მაღალი თანამდებობის პირებისა თუ სხვა საჯარო მოხელეების მიმართ მკაცრი მოთხოვნა არსებობდეს, რათა აზარტულ თამაშებში ჩართვის საშუალება არ ჰქონდეთ,“-აღნიშნა გოგიჩაიშვილმა.