რუსეთის წინააღმდეგ რეზოლუციას დღეს ადამიანის უფლებათა დაცვის კომიტეტზე განიხილავენ

პოლიტიკა - 10:45, 20 Mar, 2018

1238

რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და „ოთხოზორია-ტატუნაშვილის სიის“ შესახებ საქართველოს პარლამენტის რეზოლუცია დღეს ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე განიხილავენ. მომხსენებელი ფრაქცია „ქართული ოცნების“ თავმჯდომარე მამუკა მდინარაძე იქნება.

დოკუმენტის მიხედვით, დეპუტატები სანქციების დაწესებას ითხოვენ საოკუპაციო რეჟიმის იმ წარმომადგენლების წინააღმდეგ, რომლებიც საქართველოს მოქალაქეების მკვლელობაში, გატაცებაში, წამებასა და არაჰუმანურ მოპყრობაში არიან ბრალდებულები ან მსჯავრდებული. ვინ შევა სიაში, ეს საქართველოს მთავრობამ უნდა გადაწყვიტოს და 15 ივნისამდე პარლამენტს კონკრეტული სახელები და გვარები მიაწოდოს. გუშინ აღნიშნული რეზოლუცია საგარეო ურთიერთობათა კომიტეტის სხდომაზე განიხილეს. საპარლამენტო უმრავლესობის ლიდერი არჩილ თალაკვაძე წინადადებით გამოვიდა, აღნიშნულ რეზოლუციაში, გიგა ოთხოზორიას და არჩილ ტატუნაშვილის გარდა, დავით ბაშარულთან დაკავშირებული ჩანაწერი დაემატოს. რეზოლუციას გუშინ საგარეო ურთიერთობათა კომიტეტმა მხარი დაუჭირა.

რეზოლუციის სამუშაო პროექტი შეგიძლიათ იხილოთ ბმულზე