„ეროვნულ დემოკრატიული პარტიის“ ლიდერი ბაჩუკი ქარდავა ოპოზიციის წარმომადგენლებთან ერთად საყდრისის იმ ტერიტორიაზე იმყოფება, რომელზეც ხელისუფლებას აუქციონი აქვს გამოცხადებული. როგორც ბაჩუკი ქარდავამ განაცხადა, ტერიტორიაზე კომპანია „არემჯიგოლდი“ უკვე აწარმოებს უკანონო საქმიანობას, რაც იმის მანიშნებელია, რომ ამაში ხელს ხელისუფლება უწყობს.

„პირველი და უმთავრესი: გასაგებია, რისი დამალვა უნდოდათ კომპანიის წარმომადგენლებს, ისინი მაქსიმალურად ცდილობდნენ, რომ ჩვენ ამ ტერიტორიაზე არ მოვხვედრილიყავით. ეს ტერიტორია მათ უკვე ნაგავსაყრელად აქციეს. აქ უკვე მიმდინარეობს სამუშაოები და იცოდეთ, რომ ეს არის ტერიტორია, რომელიც ჯერჯერობით არ არის მათი საკუთრება, რომლის აუქციონშიც ჩვენი ფონდი - „დმანისის გადარჩენისთვის“ იღებს მონაწილეობას. ეს არის უკანონო საქმიანობა. მეორე - ხვალ აუქციონი ცხადდება, ჯერჯერობით ერთი ბიჯია მხოლოდ ფონდის. ვნახოთ, რა ზომებს მიმართავს ხელისუფლება. ჩვენ ნამდვილად არ ვიკვებებით ილუზიით, რომ ისინი ასე მარტივად დათმობენ ამ ტერიტორიას, ბუნებრივია, მათ ეს ჭირდებათ და მიტაცება სურთ. ჩვენი მთავარი მიზანია, საზოგადოებას დავანახეთ, თუ რეალურად რას შვება დღევანდელი ხელისუფლება. ის აწარმოებს უკანონო საქმიანობას ამ ტერიტორიაზე, რომელიც ერთის მხრივ უქმნის ჯანმრთელობის პრობლემას აქაურ მოსახლეობას, მეორეს მხრივ კი ანადგურებს ეკოლოგიას და არღვევს საქართველოს კანონმდებლობას. მეტი რაღა უნდა მოხდეს?!“ - განაცხადა ბაჩუკი ქარდავამ.