ურიდიულ საკითხთა კომიტეტი "ქურდულ სამყაროსა” და ორგანიზებულ დანაშაულთან დაკავშირებით კანონპროექტს განიხილავს

პოლიტიკა - 13:27, 19 Mar, 2018

1682

პარლამენტის იურიდიულ საკითხთა კომიტეტი ”ქურდულ სამყაროსა” და ორგანიზებულ დანაშაულთან დაკავშირებით კანონში შესატან ცვლილებებს განიხილავს. აღნიშნული კანონპროექტის თანახმად ცვლილება რამდენიმე კანონში შედის. როგორც პარლამენტის მიერ გამოქვეყნებულ ინფორმაციაშია ნათქვამი, პროექტით არსებითად იცვლება „ქურდული სამყაროს“, „ქურდული სამყაროს“ წევრის, „კანონიერი ქურდის“, „ქურდული გარჩევის“ დეფინიციები, ამასთან, იხვეწება კანონში წარმოდგენილი დეფინიციები და ემატება ისეთი ტერმინები, როგორიცაა, „ქურდული სამყაროს“ საქმიანობა და „ქურდული შეკრება“. „ქურდული სამყაროს“ წევრობა გახდა დენადი დანაშაული, აღნიშნული უწყვეტად ხორციელდება ამ სტატუსის შეძენიდან მის გაუქმებამდე. დღეს მოქმედი რედაქციით აღნიშნული დანაშაული განგრძობად ხასიათს ატარებს, რამდენადაც სტატუსის შეძენასთან ერთად პასუხისმგებლობის დაკისრებისთვის მოითხოვს აქტიური მოქმედებების განხორციელებასაც. შეიცვალა „ქურდული გარჩევის“ ცნების განმარტება და ა.შ. აღნიშნული ცვლილებებიდან გამომდინარე წარმოდგენილია გამომდინარე კანონპროექტები. მომხსენებელი შინაგან საქმეთა სამინისტროა.

კანონპროექტის განხილვის ფორმატთან დაკავშირებით კომიტეტის სხდომაზე დისკუსია გაიმართა. დეპუტატების ნაწილი ითხოვდა რომ კანონპროექტი დახურულ ფორმატში განხილულიყო, რადგან მათი აზრით განხილვის თემა შესაძლოა გამხდარიყო კონკრეტული საქმეები, რომელზეც საჯაროდ საუბარი მიზანშეწონილი არ იქნებოდა. დეპუტატების მოსაზრებას იზიარებდა შინაგან საქმეთა სამინისტროს წარმომდგენელი, მინისტრის მოადგილე ნათია მეზვრიშვილი. თუმცა კომიტეტის თავმჯდომარემ საწინააღმდეგო პოზიცია დააფიქსირა. სხდომაზე კენჭისყრა ჩატარდა, რომლის შედეგებითაც გადაწყდა, რომ კანონპროექტს კომიტეტი ღია რეჟიმში განიხილავს.