14 პოლიტიკური პარტიის წარმომადგენლები დმანისში გამგზვრებას აპირებენ. პოლიტიკოსები კომპანია არემჯიგოლდისთვის აუქციონის წესით დამატებითი 16 ჰექტრის გადაცემას აპროტესტებენ. ისინი დმანისში ჩასვლას და ტერიტორიის ნახვას აპირებენ, მათი ინფორმაციით კომპანიამ უკვე დაიწყო სამუშაოები ამ ტერიტორიაზე, რაც უკანონოა.

ოპოზიციური პარტიების წარმომადგენლებმა „დმანისის გადაჩენის ფონდი" დააფუძნეს, რომელიც ეკონომიკის სამინისტროს მიერ გამოცხადებულ აუქციონში ჩაერთვება და კონკურენციას გაუწევს კომპანია RMG GOLD- ს, რომელსაც მათი თქმით ხელისუფლება მფარველობს.

„ივანიშვილის 15 ათას ლარად 16 ჰექტარი ტყის წაღებას და იქ ციანიდის მოსხმას, რომ იდევ უფრო განვითარდეს მრავალი მილიონით მისი ბიზნესი. ძალიან მიხარია, რომ მრავალპარტიული ფორმატია, სადაც ხელს შევუშლით ამ ადამიანს, ესე მას ცხოვრება ამ ქვეყანაში არ გაუვა“-განაცხადა „ ნაციონალური მოძრაობის“ ერთ-ერთმა ლიდერმა ნიკა მელიამ.

„ახალი საქართველოს“ ლიდერის გიორგი ვაშაძის განცხადებით, პარტიები გეგმავენ თავად მიიღონ აუქციონში მონაწილეობა და გამოისყიდონ აღნიშნული ტერიტორია.

„გვაქვს კონკრეტული გეგმა დმანისის გადასარჩენად ვიღებთ მონაწილეობას აუქციონში ვაპირებთ ეს ტერიტორია ჩვენ ავიღოთ იჯარით არ მივცეთ შესაძლებლობა ამ ყველაფერის განადგურების ოქროს მომპოვებელ კომპანიას“-ამბობს ვაშაძე.

”თავისუფალი დემოკრატების” გენერალური მდივნის თამარ კეკენაძის განცხადებით, ინტერპარტიული ჯგუფი ადგილზე შეისწავლის ვითარებას და შეეცდება არ დაუშვას ის კორუფციული გარიგება, რომელიც იგეგმება.

„ინტერპარტიული ჯგუფი მივდივართ დმანისში, რომ შევამოწმოთ ადგილზე რა ვითარებაა. „RMG Gold“ ყველა სტანდარტის დარღვევით აწარმოებს საქმიანობას, რაც აისახება ადამიანის ჯანმრთელობაზე, დამატებით ისინი ცდილობენ უკვე კორუფციული გზით დამატებითი მიწების შეძენას და ამ ტიპის საქმიანობის გაგრძელებას, რაც საზიანოა ადგილობრივი მოსახლეობისთვის“- განაცხადა თამარ კეკენაძემ.