„ქაოსური სიტუაცია იყო... უსაფრთხოებასთან დაკავშირებით ძალიან დიდი კითხვები არსებობს“ - ტურისტები გუდაურში მომხდარ შემთხვევას იხსენებენ

პოლიტიკა - 16:05, 17 Mar, 2018

1446

გუდაურში მომხდარ უბედურ შემთხვევას იხსნებენ ტურისტები. ერთერთი მათგანი ყვება, რომ ის საბაგიროზე ასვლას აპირებდა, როდესაც საბაგირო მწყობრიდან გამოვიდა.

„ისე გამოვიდა, რომ კამერა არ იყო გამორთული და ავტომატურად ყველაფერი გადაიღო. როგორც კი საბაგირო გაჩერდა, ადამიანის დასახმარებლად მივედი, რომელიც სავარძლის ქვეშ იყო მოყოლილი, ყველაფერი ძალიან სწრაფად მოხდა, გაცნობიერებაც ვერ მოვასწარი,“ - ეს განცხადება ტურისტმა გააკეთა.

ტურისტები უსაფრთხოების კუთხით არსებულ ხარვეზებზე საუბრობენ და ამბობენ, რომ მოსწონთ კურორტი, თუმცა ბევრი რამ გამოსასწორებელია, მათ შორის ტრასები.

„ადგილობრივი ძალები არ ჰყოფნიდათ ხალხის დასახმარებლად, ძალიან ქაოსური სიტუაცია იყო. ვფიქრობ, რომ იმ ორ საათში შეიძლებოდა, თბილისიდან ჩამოეყვანათ ვერტმფრენებით ან მანქანებით სპეცსამსახურები და ხალხს დახმარებოდნენ. სიმართლე გითხრათ, ეჭვქვეშ დადგა აქ ჩამოსვლის სურვილი... უსაფრთხოებასთან დაკავშირებით ძალიან დიდი კითხვები არსებობს. დიდი ხანია, იქცევს ყურადღებას, რომ ძალიან ცუდადაა აღნიშნული ტრასა, რაც ნისლის დროს განსაკუთრებულ პრობლემას ქმნის. გაუგებარია, რას აკეთებენ აქ პოლიციელებიც, უბრალოდ, სრიალებენ და ისვენებენ,“ - აღნიშნა დამსვენებელმა.

გუდაურში მომხდარ ინციდენტთან დაკავშირებით გამოძიება უკვე დაწყებულია. გამოძიება და საერთაშორის ექსპერტები აღნიშნულ შემთხვევას გამოიძიებენ.