"მე მიმაჩნია, რომ საქართველო ნატოს წევრი უნდა გახდეს დღეს"- მარგველაშვილი

პოლიტიკა - 15:13, 16 Mar, 2018

1631

საქართველოს პრეზიდენტმა „ამერიკის ხმასთან“ ინტერვიუში საქართველოს ევროატლანტიკურ ინტეგრაციაზე და ამერიკის შეერთებულ შტატებთან კიდევ უფრო დაახლოებაზე ისაუბრა. გიორგი მარგველაშვილის თქმით, მისი აშშ-ში ვიზიტის მიზანი აშშ-საქართველოს ურთიერთობის კიდევ უფრო მაღალ დონეზე აყვანაა.

„ვაშინგტონში ვიზიტის მიზანია, ჩვენი ურთიერთობის კიდევ უფრო მაღალ დონეზე აყვანა, ემოციურად ყოველთვის მდიდარია ვაშინგტონში ჩამოსვლა, იმიტომ რომ მე ვხედავ მეგობრებს, რომელთანაც არ მჭირდება არავის დარწმუნება ჩვენს თანამშრომლობაში, ჩვენ უბრალოდ ვლაპარაკობთ ჩვენს სტრატეგიაზე.“- განაცხადა მარგველაშვილმა.
პრეზიდენტის თქმით, NATO-ს ბრიუსელის სამიტზე საქართველოს აქვს მოლოდინი, რომ მოხდება წარმატებული პარტნიორობის აღიარება და ალიანსის ნაბიჯებიც შესაბამისი იქნება: „რას მოველით ჩვენ ამ საიუბილეო წელწადს? ჩვენ მოველით იმას, რომ მოხდება იმ ძალიან წარმატებული პარტნიორობის აღიარება და შესაბამისად დაფიქსირება, რომელიც საქართველომ და ნატომ განვლეს ამ 16 და 10 წლის განმავლობაში. ჩვენ ველით ჩვენი წარმატების აღიარებას და ადეკვატურად ნაბიჯების გადადგმას. ჩვენი ამბიცია არის ძალიან ნათლად დაფიქსირებული. ჩვენ გვაქვს ყველა მექანიზმი და მეტიც, ამ ყველა მექანიზმში და მოთხოვნაში, რაც არსებობს ალიანსის მიერ, ყველგან ვართ საუკეთესოები ასპირანტებს შორის. კითხვის ნიშნები საქართველოსთან მიმართებაში არ არსებობს. როდესაც არის ჩვენ რეფორმებზე, ჩვენ მონაწილეობაზე რთულ წერტილებში კითხვის ნიშნები არ არსებობს. ამავე დროს ფორმატი იმისა, რომ ნატო არის არა მხოლოდ კოლექტიური უსაფრთხოების ორგანიზაცია, არამედ კოლექტიური გადაწყვეტილების მიმღები სტრუქტურა . ეს ალიანსი, რომლისკენაც ჩვენ ძალიან სწორად მივისწრაფვით და რომლის გარდაც საქართველოს სხვა უსაფრთხოების არჩევანი არ გააჩნია, გვიფიქსირებს ჩვენ შემდეგ პროცედურულ დინამიკას, ჩვენ აუცილებლად მაპის გავლით უნდა გავხდეთ ალიანსის წევრები. რა არის ჩვენი სურვილი და ამბიცია? ჩვენი ამბიცია არის წევრობა. მაგრამ მაპი არის ის აუცილებელი ნაბიჯი, რომელიც უნდა გადაიდგას. ჩვენ ამ საკითხს ვამუშავებთ ჩვენს პარტნიორებთან, ჩვენი ამბიცია მარტივად არის რომ გავხდეთ ნატოს წევრები, რა ნაბიჯები გვაქვს გადასადგმელი ამაზე ჩვენ პარტნიორებთან ვმუსაობთ. მე მიმაჩნია, რომ საქართველო ნატოს წევრი უნდა გახდეს დღეს, რა ნაბიჯებია გასავლელი, არა ჩვენი მხრიდან, არამედ ჩვენი პარტნიორების მხრიდან და რაზე არის მზაობა, ამაზე მიდის მუშაობა.“- განაცხადა გიორგი მარგველაშვილმა.