"გამოთქმული კრიტიკა უპასუხისმგებლო და უშედეგოა" - მიხეილ ჯანელიძე მოძრაობა "საქართველოსთვის" პასუხობს

პოლიტიკა - 14:02, 16 Mar, 2018

1410

საქართველოს საგარეო სამეთა მინისტრი მიხეილ ჯანელიძე, მოძრაობა "საქართველოსთვის" მის მიმართ გამოთქმულ კრიტიკას პასუხობს.

მინისტრი მიესალმება ახალგაზრდების შეფასებას თუმცა, მისი თქმით, ყველა გამოთქმული მოსაზრება უპასუხისმგებლო და უშედეგოა.

"პირველ რიგში, მსურს მივესალმო ახალგაზრდებს, რომლებიც მიუხედავად პარტიული და სამოქალაქო სექტორის სხვადასხვა ორგანიზაციის წევრობისა, ერთიანდებიან და აფიქსირებენ საკუთარ პოზიციას თავისუფლად.

სწორედ, აზრის თავისუფლად გამოხატვის შესაძლებლობა, მთავრობის გავლენისგან თავისუფალი პოლიტიკური პარტიები, მოძრაობები, სამოქალაქო სექტორი, თავისუფალი მედია, ეს არის ის მონაპოვარი, რითაც ჩვენი მთავრობა ამაყობს დღეს, და რამაც უზრუნველყო დემოკრატიის ხარისხობრივად ახალ დონეზე გადაყვანა ჩვენს ქვეყანაში, ჩვენი მოქალაქეების თავისუფლება და განსაკუთრებული პროგრესი ევროკავშირში და ნატოში ინტეგრაციის პროცესში.

ჩემი, ისევე როგორც მთავრობის, გაცხადებული მიზანია მეტი პოლიტიკური და სამოქალაქო დიალოგისა და ჩართულობის უზრუნველყოფა გადაწყვეტილებების მიღების პროცესში. მე პირადად, ყოველ კვარტალში, მაქვს შეხვედრა სამოქალაქო სექტორთან, სადაც ვიხილავთ საგარეო პოლიტიკასთან დაკავშირებულ ყველა საკითხს. ჩვენ, გასულ წელს, ჩავრთეთ სამოქალაქო სექტორი ევროკავშირთან ასოცირების დღის წესრიგის შემუშავების პროცესში, რამაც შედეგად მოიტანა ამბიციური დოკუმენტის შემუშავება და მოლაპარაკება ევროკავშირთან, რაც თავისთავად უზრუნველყოფს მეტი წარმატებული ნაბიჯის გადადგმას ევროკავშირისკენ მიმავალ გზაზე.

დემოკრატია, ევროპული ფასეულობების განუხრელი დაცვა, საზოგადოებრივი და პოლიტიკური ჩართულობა, არის უაღრესად მნიშვენლოვანი ჩვენი ურთულესი საგარეო პოლიტიკური მიზნების მისაღწევად, რაც უპირველეს ყოვლისა გულისხმობს საქართველოს ტერიტორიული მთლიანობის აღდგენას საერთაშორისოდ აღიარებულ საზღვრებში და რუსული ოკუპაციის დასრულებას, რომელიც ღიად 2008 წლის შემდეგ ხორციელდება.

ეს არის პროცესი, რომელიც ქართულმა საზოგადოებამ ერთად უნდა განახორციელოს, თუ გვინდა რომ წარმატება გვქონდეს. ამ პროცესს სჭირდება გონივრული ნაბიჯების გადადგმა და არა ემოციებზე დაფუძნებული ან/და პოპულისტური განცხადებები, პოლიტიკური ქულების ჩასაწერად. მთავრობა სრულად აცნობიერებს საკუთარ პასუხისმგებლობას, თუმცა ოპოზიციურ პოლიტიკურ პარტიებსაც და სამოქალაქო სექტორის წარმომადგენლებს, მართებთ მაღალი პასუხისმგებლობის გამოჩენა, განსაკუთრებით ისეთ საკითხზე, როგორიცაა რუსეთ-საქართველოს კონფლიქტი.

ჩვენც გვაქვს უფლება, არ მივიღოთ ის კრიტიკა, რომელიც ჩვენი აზრით, უპასუხისმგებლოა და უშედეგოა.

რა თქმა უნდა, სრულად ვიზიარებ საქართველოს პრემიერ მინისტრის პოზიციასა და მიდგომას" - განაცხადა მიხეილ ჯანელიძემ.