"პარტიები თავისი ვიწროპარტიული ინტერესებიდან გამომდინარე რაღაც განცხადებებს ავრცელებენ..."

"პარტიები თავისი ვიწროპარტიული ინტერესებიდან გამომდინარე რაღაც განცხადებებს ავრცელებენ..." - კილაძის პასუხი ოპოზიციის განცხადებაზე

პოლიტიკა - 17:29, 15 Mar, 2018

989

რუსეთ-საქართველოს ურთიერთობებზე პრემიერ კვირიკაშვილის განცხადებასთან დაკავშირებით 12 ოპოზიციური პარტიის მიერ გავრცელებულ განცხადებას ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე სოფო კილაძე გამოეხმაურა. მმართველი გუნდის წევრის თქმით აღნიშნული პარტიები თავისი ვიწროპარტიული ინტერესებიდან გამომდინარე მოქმედებენ და ამითომ მმართველი გუნდი მათ წინაშე ანგარიშვალდებული არაა:

„ის რომ კიდევ რაღაც დამატებითი ფორმატები შევქმნათ და ვიღაცეების პარტიული ინტერესებისთვის იქნას ეს გამოყენებული, ეს მემგონი ჩვენი ქვეყნის ინტერესებს არ წაადგება. პარტიები თავისი ვიწროპარტიული ინტერესებიდან გამომდინარე რაღაც განცხადებებს ავრცელებენ, იმ ფონზე, როდესაც ამ პარტიებს საერთოდ არ აქვთ და არ გრძნობენ პასუხისმგებლობას მოქალაქეების წინაშე, წინააღმდეგ შემთხვევაში ისინი ასეთ განცხადებას არ გააკეთებდნენ . ამ ფონზე მე არა მგონია, რომ ჩვენ ანგარიშვალდებულები ვიყოთ ამ პარტიების წინაშე და ისე მოვიქცეთ, როგორც ისინი იტყვიან“- განაცხადა სოფო კილაძემ.

შეგახსენებთ, დღეს პროდასავლურმა ოპოზიციურმა პარტიებმა პარლამენტში შეხვედრა გამართეს და რუსეთ-საქართველოს ურთიერთობებზე პრემიერ კვირიკაშვილის განცხადებასთან დაკავშირებით ერთობლივი განცხადება გაავრცელეს, რომელშიც რამდენიმე მოთხოვნაა:

• პრო-დასავლური ოპოზიციური პარტიების მონაწილეობით შეიქმნას სპეციალური ფორმატი, რომლის ფარგლებში ჟენევის საერთაშორისო მოლაპარაკებების ყოველი რაუნდის წინ და შემდეგ შედგება სახელმწიფო წარმომადგენლების მოსმენა გაფართოებულ, ან დახურულ ფორმატში;

• მარტის თვის განმავლობაში პრემიერ-მინისტრი მოვიდეს პარლამენტში დე-ოკუპაციის პოლიტიკაზე და რუსეთთან ურთიერთობებზე პოლიტიკურ დებატებში მონაწილეობის მისაღებად;

• დროულად მიიღოს საქართველოს პარლამენტის რეზოლუცია რუსეთის ფედერაციის მიერ ოკუპირებულ აფხაზეთსა და ცხინვალის რეგიონში ადამიანის უფლებების უხეში დარღვევისა და ოთხოზორია-ტატუნაშვილის სიის შექმნის შესახებ;

• ევროკავშირის სადამკვირვებლო მისიასთან კოორდინაციაში გააძლიეროს საქართველოს შინაგან საქმეთა სამინისტროს და სახლემწიფო უსაფრთხოების სამსახურის შესაბამისი ქვედანაყოფების აქტიურობა ოკუპაციის ხაზის მიმდებარე ტერიტორიაზე