"ოპოზიციის ქმედებები უპასუხისმგებლო იყო, რეზოლუცია არის ძალიან პრინციპული"- ჯანელიძე

პოლიტიკა - 14:16, 14 Mar, 2018

1201

არჩილ ტატუნაშვილთან დაკავშირებით რეზოლუციის მიღების საკითხს საქართველოს საგარეო საქმეთა მინისტრი მიხეილ ჯანელიძე მთავრობის სხდომის დასრულების შემდეგ გამოეხმაურა. მისი თქმით, რეზოლუციის ტექსტი არის ძალიან პრინციპული, კონკრეტული და ბევრს ასპექტს მოიცავს. ჯანელიძემ კრიტიკული განცხადებების გამო ოპოზიციაც გააკრიტიკა და მათ ქმედებებს უპასუხისმგებლო უწოდა:

„ვფიქრობ, ბოლო დღეების განმავლობაში ოპოზიციის ქმედებები სრულიად უპასუხისმგებლო იყო. რა თქმა უნდა, მნიშვნელოვანია, რომ პარლამენტი იყოს ერთიანი. მნიშვნელოვანია, რომ მათ შორის, ოპოზიციისა და საერთო მიდგომა იყოს ცალსახა, როდესაც საკითხი ეხება კონფლიქტის დარეგულირებას, ჩვენი ტერიტორიული მთლიანობის აღდგენას, სუვერენიტეტის განმტკიცებას, ისეთ მძიმე ფაქტებს, როგორიც არის ჩვენი მოქალაქეების მკვლელობა და ა.შ. მაგრამ, დაველოდოთ, რა რესურსს გამოძებნის ოპოზიცია იმისათვის, რომ იყოს შესაბამისი იმ საჭიროებებთან, რომელიც დღეს უდგას ჩვენს ქვეყანას.

ვფიქრობ, უმრავლესობა აწარმოებს მოლაპარაკებებს პრინციპების შესაბამისად და რეზოლუციაც, რაც ჩვენ ამ ეტაპზე გვაქვს ნანახი, არის ძალიან პრინციპული, ძალიან კონკრეტული და მოიცავს ძალიან ბევრს ასპექტს, რომელიც მნიშვნელოვანია, როგორც ქვეყნის შიგნით პოზიციის დასაფიქსირებლად, ასევე საერთაშორისო საზოგადოებისთვის პარლამენტის და პოლიტიკური სპექტრის ხმის მისაწვდენად. რეზოლუციაში ბევრი ასპექტია, რომელზეც საჭიროა მსჯელობა, მათ შორის სამართლებრივი და პოლიტიკურიც და ვნახოთ რა იქნება, დებატების საბოლოო შედეგი.“ – განაცხადა მიხეილ ჯანელიძემ.