"თუ არ შეჩერდება საყდრისის აუქციონი, ფონდს დავაფუძნებთ და გამოვისყიდით მიწას"

"თუ არ შეჩერდება საყდრისის აუქციონი, ფონდს დავაფუძნებთ და გამოვისყიდით მიწას" - პაატა მანჯგალაძე

პოლიტიკა - 12:59, 14 Mar, 2018

1381

საყდრისის გადარჩენისთვის პოლიტიკურმა პარტიებმა ეკონომიკის სამინისტროს მიმართეს და დაგეგმილი აუქციონის გაუქმება მოითხოვეს.

განცხადების ავტორები, აცხადებენ, რომ თუ ეკონომიკის სამინისტრო არ დააკმაყოფილებს მათ მოთხოვნას, ისინი საზოგადოებრივ ფონდს შექმნიან და კონკურენციას გაუწევენ შპს RMG Gold-ს.

”ახალი საქართველოს” პოლიტიკური მდივანი პაატა მანჯგალაძე აცხადებს, რომ თუ არ შეჩერდება აუქციონი, მაშინ პარტიები მოუწოდებენ საზოგადოებას შემოიტანონ ფონდში შემოწირულობა, რათა მოხდეს მიწის გამოსყიდვა.

„იმისთვის, რომ ზუსტად გავიაზროთ რაც იქ ხდება, დღეს, აუცილებელია ვიცოდეთ წინა პერიოდი, როცა საყდრისის აფეთქება მოხდა და ჩვენ ვიცით პერიპეტიები, როცა კომისიამ შეუცვალა მემკვიდრეობის ძეგლის სტატუსი, იქ იყვნენ ადამიანები, დამოუკიდებელი ექსპერტების სახით, რომლებიც პირდაპირ დაკავშირებულნი იყვნენ “RMG GOLD”-თან, ეს დადასტურებული ფაქტია. ასევე ვიცით, რომ როცა მთავარი პროკურორი გადადგა პირდაპირ ამ კომპანიის ინტერესების დამცველი გახდა. ასეთი მაღალი ლობირება ხელისუფლების მხრიდან, მაღალი ალბათობის ეჭვს ბადებს, რომ აქ არის ხელისუფლების ინტერესი, რადგან ძეგლისთვის უცებ მოხდა სტატუსის შეცვლა, ახლაც ფაქტობრივად ეკოციდია ადგილზე და არცერთი სახელმწიფო უწყება, რომელიც პასუხისმგებელია ადამიანების ჯანმრთელობაზე ადგილზე კვლევებს არ ატარებს. ვიცით არასამთავრობო ორგანიზაციების კვლევები, რომლებიც ამბობენ, რომ ჯანმრთელობისთვის საშიშ ნიშნულთან არის მისული ფაქტობრივად ყველა მაჩვენებელი. ეს გვაიძულებს, რომ გადავიდეთ შემდეგ ქმედებაზე, ახლა მიზანია, რომ შევაჩეროთ აუქციონი, თუ ეს არ მოხერხდა, ვფიქრობთ, რომ დავაფუძნოთ ფონდი, რომლის ფარგლებშიც, ადამიანების თანამონაწილეობით ყველა ერთად გამოვისყიდით ამ მიწას, რომ არ მოხდეს იმ ეკოციდის გაგრძელება, რაც ადგილზე ხდება“ - თქვა მანჯგალაძემ.