„სითი პარკი“ განცხადებას ავრცელებს და თბილისის მერის გადაწყვეტილებას პოლიტიკურად მოტივირებულს და უკანონოს უწოდებს

პოლიტიკა - 12:59, 14 Mar, 2018

1739

თბილისის მერიის მხრიდან ხელშეკრულების გაუქმების შემდეგ, კომპანია „სითი პარკი“ საგანგებო განცხადებას ავრცელებს, რომელშიც ნათქვამია, რომ დედაქალაქის მთავრობის გადაწყვეტილება საქართველოს საინვესტიციო კლიმატზე უარყოფითად აისახება, რაც როგორც კომპანიის მფლობელების დევიდ პილას და ნათან შორერის მიერ გავრცელებულ განცხადებაში ნათქვამი, არ აღელვებთ ძალაუფლების მქონე ბიუროკრატებს, რომლებიც საკუთარი კერძო ინტერესებიდან გამომდინარე მოქმედებენ.

„თბილისის მერის, ბ-ნი კახა კალაძის გუშინდელი განცხადება შპს „სი-ტი პარკ“-თან გაფორმებული ხელშეკრულების ცალმხრივი შეწყვეტის შესახებ არის უკანონო, პოლიტიკურად მოტივირებული გადაწყვეტილება და საუკეთესო მაგალითი იმისა, თუ როგორ ეპყრობა საქართველოს ხელისუფლება უცხოელ ინვესტორებს. მთელი სახელმწიფო აპარატი, ხელისუფლების სხვადასხვა შტოს ჩათვლით, გამოყენებულ იქნა კონკრეტული ძალების მიერ და მოქმედებდა კოორდინირებულად, „სი-ტი პარკ“-ის საქართველოდან უკანონოდ გაძევების მიზნით. ხელისუფლება მოქმედებდა არაკეთილსინდისიერად, უგულებელჰყოფდა ინვესტორის მხრიდან სისტემატურ კომუნიკაციას და იმ გარემოებას, რომ ამჟამად მიმდინარეობს ორი სასამართლო პროცესი, რომელშიც შპს „სი-ტი პარკი“ დავობს მის მიმართ კანონდარღვევის აბსურდული ბრალდებების საკითხზე. ხელისუფლება ცდილობდა შეექმნა სამართლებრივი პროცესის ილუზია მაშინ, როდესაც საბოლოო შედეგი (ხელშეკრულების უკანონო შეწყვეტა კანონზე და სასამართლოზე მაღლა მდგომი კონკრეტული ჯგუფების ინტერესების გამო) წინასწარ იყო განსაზღვრული. „სი-ტი პარკი“ განიხილავს ყველა შესაძლებლობას და მიმართავს ყველა საშუალებას, რომელსაც მას ანიჭებს ქართული და საერთაშორისო სამართალი. კომპანიის მფლობელები ასევე გაავრცელებენ ამ ინფორმაციას ისრაელის და საერთაშორისო ბიზნეს საზოგადოებაში. აღნიშნული ცალსახად უარყოფითად აისახება საქართველოს საინვესტიციო კლიმატზე, რაც, როგორც ჩანს, არ აღელვებთ ძალაუფლების მქონე ბიუროკრატებს, რომლებიც მოქმედებენ საკუთარი კერძო ინტერესებიდან გამომდინარე.“- აღნიშნულია განცხადებაში.