"უკანონო და ანტისახელმწიფოებრივი ქმედება, RMG Gold-ს ხელისუფლება მფარველობს"- ნიკა ვაჩეიშვილი

პოლიტიკა - 11:50, 14 Mar, 2018

1560

13 პოლიტიკური პარტია RMG Gold-ის მომიჯნავე მიწის ნაკვეთზე გამოცხადებული აუქციონის გაუქმებას ითხოვს. შესაბამისი მოთხოვნით მათ საქართველოს ეკონომიკისა და მდგრადი განვითარების მინისტრს დიმიტრი ქუმსიშვილს და ქონების ეროვნული სააგენტოს თავმჯდომარეს ეკატერინე სისაურს დღეს მიმართეს.

როგორც ჟურნალისტებს "ნაციონალური მოძრაობის" წევრმა ნიკა ვაჩეიშვილმა განუცხადა, მათი მოთხოვნაა, გაუქმდეს სოფელ დიდ დმანისში შპს RMG Gold-ის მომიჯნავედ 16 ჰა მიწის ნაკვეთზე გამოცხადებული აუქციონი.

ოპოზიციონერმა თქვა, რომ აუქციონი უნდა შეჩერდეს, რადგან ის ანტისახელმწიფოებრივი და უკანონოა.

"ეს აუქციონი არის უკანონო იმიტომ, რომ არის ანტისახელმწიფოებრივი და ამას მფარველობს თავად სახელწიფო. რეალური რისკია ეკოლოგიური კატასტროფის, ამიტომ, უნდა შეჩერდეს აუქციონი", - განაცხადა ნიკა ვაჩეიშვილმა.

მისი თქმით, შპს RMG Gold-ს სახელმწიფო მფარველობს.

"ჩვენ მივიღებთ ეკოლოგიურ კატასტროფას, რაც დაუშვებელია და სწორედ ამას ვაპროტესტებთ. საზოგადოება, პოლიტიკური პარტიები აუცილებლად უნდა იყვნენ კონსოლიდირებულები ასეთი მავნებლური ქმედების წინააღმდეგ. ეს სამუშაოები ეკოლოგიურ ვითარებას და რეგიონის წინსვლას მნიშვნელოვნად აზარალებს. ასეთი ქმედება სახელმწიფოს მხრიდან მიუღებელია"- დასძინა ვაჩეიშვილმა.