მოსკოვის ცინიკური პასუხის შემდეგაც კი ტატუნაშვილის მკვლელობაზე "ოცნება" რეზოლუციის მიღებას არ ჩქარობს

პოლიტიკა - 21:12, 13 Mar, 2018

1641

მმართველი პარტიის წარმომადგენლები ირწმუნებიან, რომ არჩილ ტატუნაშვილთან დაკავშირებით პარლამენტის რეზოლუცია მკაცრი იქნება.

ფრაქცია „ქართული ოცნების“ თავმჯდომარე აცხადებს, რომ დოკუმენტში აისახება ის რეალობა, რომელიც ქვეყანას ოკუპირებულ ტერიტორიებზე აქვს.

მდინარაძემ რუსეთის საგარეო საქმეთა სამინისტროს განცხადებაც შეაფასა:

„პრემიერ–მინისტრის განცხადებაზე რუსეთის საგარეო უწყების პასუხი სწორედ იმ პოლიტიკის გაგრძელებაა, რომელსაც მრავალი წელია რუსეთი ახორციელებს. ასეთი პასუხით ოკუპირებულ ტერიტორიებზე ჩადნილი დანაშაულისგან გამიჯვნას ცდილობენ, რაც არ გამოუვათ, რადგან პასუხისმგებლობა იმაზე, რაც ცხინვალსა და აფხაზეთში ხდება, ოკუპანტ ქვეყანას ეკისრება“,- თქვა დეპუტატმა.

ზაქარია ქუცნაშვილიც ამბობს, რომ პარლამენტის მიერ მიღებული რეზოლუცია იქნება საკმაოდ მწვავე და საკმაოდ კონკრეტული.

რაც შეეხება პრემიერ–მინისტრის პოზიციას, "ოცნების" წარმომადგენელმა თქვა, რომ კვირიკაშვილი მყარად არის დარწმუნებული რუსეთის მიმართ საკუთარი განცხადების სისწორეში.

მეტიც, ქუცნაშვილი ამბობს, რომ უმრავლესობა სოლიდარულია პრემიერ–მინისტრის განცხადების მიმართ.
„ამ შემთხვევაში პარლამენტს, როგორც ხალხის წარმომადგენლობით ორგანოს, ყველანაირი უფლება აქვს იყოს ძალიან ზუსტი და მომთხოვნი. შესაბამისად, მომავალ კვირას ჩვენ მივიღებთ რეზოლუციას და ნახავთ, რომ ის იქნება საკმაოდ მკაცრი და მომთხოვნი“, – განუცხადა ჟურნალისტებს ქუცნაშვილმა.

ამ დრომდე უცნობია როდის მიიღებს უმრავლესობა რეზოლუციას. ქვეყნის პრემიერ-მინისტრს კი აღნიშნულ საკითხზე და მათ შორის ოკუპანტი ქვეყნის განცხადებაზე დღეს კომენტარი არ გაუკეთებია.