საზოგადოებრივი მაუწყებლის გენერალური დირექტორი, ვასილ მაღლაფერიძე, საზოგადოებრივი მაუწყებლის ბორდის წევრობის კანდიდატების შეფასებისას თქვა, რომ ზაზა შათირიშვილი ღირსეული კანდიდატი იქნება.

„ზაზაც მგონია, რომ იქნება ნამდვილად ღირსეული კანდიდატი, ეს ერთი. მეორე, მინდა, გითხრათ და გაითვალისწინოთ, რომ მეგობრობა, რასაც თქვენ გულისხმობთ, ადამიანებს ხელს არ უშლის. ადამიანებს ხელს უშლის, როდესაც არც მეგობრობის გაგება აქვთ სიღრმისეულად და არც ზოგადად, განათლება არა აქვთ და არც ცოდნა არა აქვთ და შეუძლიათ, ყველა სისულელეზე შემდეგ კითხვებით გააგრძელონ.

მგონია, რომ დიდი სირცხვილი, მათ შორის, ქართველი ჟურნალისტების, ვინც გაიმეორა, რომლებმაც ფოტოს კომენტირება დაიწყეს. საქართველოში, სადაც სამი მილიონი ადამიანი ცხოვრობს, ნახევარი ერთმანეთის ნათესავია, ნახევარი მეგობარია,“ - განაცხადა ვასილ მაღლაფერიძემ.

მისი თქმით, არ უნდა მიმდინარეობდეს იმის გარჩევა, ვინ ვისი მეგობარი ან ნაცნობია.

„მე დარწმუნებული ვარ, რომ ჩემს მეგობრებს, სულ ყველას შეეწევა ჩემი მეგობრობა, როგორც მე მეწევა მათი მეგობრობა... თქვენ რა გინდათ მითხრათ, რომ ზაზა შათირიშვილის მთელი მისი საქმიანობა არის, რომ ჩემი მეგობარია? მე ჩამოგითვალოთ, შეიძლება ვიღაც კიდევ არის ჩემი მეგობარი, მათ შორის, ამ კომისიაში ან წევრებს შორის, მერე რა იცვლება ამით? ან ვიღაცის მეგობარია, მერე რა? ჩვენ შევდივართ ამის განხილვაში?“ - განაცხადა მაღლაფერიძემ.

საპარლამენტო უმცირესობის ინფორმაციით, შათირიშვილს მმართველი გუნდი და საზოგადოებრივი მაუწყებლის გენერალური დირექტორი, ვასილ მაღლაფერიძე, ლობირებს.