"მოუმზადებელი და ნაჩქარევი გადაწყვეტილება" - როგორ აფასებს ოპოზიცია მერიის მიერ "სითი პარკთან" ხელშეკრულების გაწყვეტას

პოლიტიკა - 16:04, 13 Mar, 2018

1611

მოუმზადებელი და ბუნდოვანი აღმოჩნდა თბილისის მერის მიერ „სითი პარკთან“ ხელშეკრულების გაწყვეტა ოპოზიციისთვის.

ხელისუფლების ოპონენტები კახა კალაძისგან მეტი დეტალის გაღღერებას მოითხოვენ.

„გადაწყვეტილება მოუმზადებელია და ძალიან ბუნდოვანია. გასაგებია, როდესაც ისინი იძახიან, რომ არ აპირებენ ისინი თანხის გადახდას, ამ შემთხვევაში ჩვენ „სითი პარკის“ პოზიცია არ მოგვისმენია, ანუ ის რას აპირებს. მართლა ასე გავა თუ არა დედაქალაქიდან ისე, რომ ჯარიმას არ მოითხოვს, მეორე ის, რომ გაუგებარია, არ პირობებით შემოჰყავს ახალი კომპანია ან კომპანიები თბილისის მერიას. ეს იქნება ფიქსირებული ტარიფი თუ იქნება ზონირებული გადასახადი. იმ შემთხვევაში თუ იქნება ზონირებულიგადასახადი, პარკირების ტარიფი თბილისელებს ძალიან გაუძვირდებათ. როდემდე იმუშავებს თბილისში სატრანსპორტო კომპანია“,- განაცხადა "ნაციონალური მოძრაობის" წევრმა, ზალიკო უდუმაშვილმა.

კითხვები აქვს თბილისის საკრებულოს ფრაქცია „ევროპული საქართველო - თბილისის“ თავმჯდომარე, გიორგი გაბაშვილსაც.

„როგორი იქნება სისტემა, რა გაკეთდება, როგორ განიტვირთება მოძრაობა, ქალაქში, სადაც 400 ათასი მანქანაა და მხოლოდ ათასი სადგომი ადგილი, იქ როგორ მოწესრიგდება ეს საკითხი. როგორი იქნება ჯარიმები, როგორი იქნება ახალი სისტემა, აშენდება თუ არა პარკინგები, მიწისზედა, მიწისქვედა, სად აშენდება, როგორ განიტვირთება ის სქემა, რომელიც არის ქალაქში, ამაზე არანაირი ინფორმაცია არ გვაქვს, არანაირი კომპლექსური რეფორმის გეგმა წარმოდგენილი არ არის“,- განაცხადა დეპუტატმა.