„რუსეთი პასუხისმგებლობას გაემიჯნა, ამის საფუძველი ჩვენმა პრემიერ-მინისტრმა შეუქმნა“- გია ხუხაშვილი

პოლიტიკა - 12:40, 13 Mar, 2018

2522

რუსეთის საგარეო საქმეთა სამინისტრო საქართველოს პრემიერ-მინისტრის წერილს პასუხობს. სერგეი ლავროვის უწყება დადებითად აფასებს გიორგი კვირიკაშვილის მზაობას ჟენევის დისკუსიებში ჩართვასთან დაკავშირებით, აღნიშნულს კრიტიკული შეფასებები მოჰყვა საქართველოს ოპოზიციური პარტიებისა და ექსპერტების წრეებში.

ექსპერტი გია ხუხაშვილი „ნიუპოსტთან“ საუბრისას აღნიშნავს, რომ რუსეთის საგარეო საქმეთა სამინისტროს განცხადებიდან ჩანს, რომ რუსეთი პასუხისმგებლობისგან გამიჯვნას ცდილობს, ამის საფუძველი კი მას საქართველოს პრემიერ-მინისტრმა მისცა თავისი განცხადებით:

„ეს განცხადება, როგორც ფორმით, ასევე შინაარსით პრობლემატურია. რაც შეეხება ფორმას, ის დაკნინებულია, რადგან პრემიერ-მინისტრის განცხადებას თუ პრეზიდენტი არა, მინისტრი მაინც უნდა პასუხობდეს და ამ შემთხვევაში მინისტრი კი არა, განცხადებას სამინისტროს ინფორმაციის დეპარტამენტი აქვეყნებს. ეს დიპლომატიური ეტიკეტით მაქსიმალური დაკნინებაა დამოკიდებულების.

რაც შეეხება შინაარსს, მთავარი პრობლემა რაც აქ ჩნდება არის ის, რომ თითქოს მხარეები თანხმდებიან იმაზე, რომ პირდაპირ უნდა ველაპარაკოთ ოსებს და აფხაზებს და რუსეთი თითქოს მხოლოდ მედიატორია ამ პროცესში. რაც წინააღმდეგობაში შედის მრავალწლიან სტრატეგიასთან. ჩვენ ვამბობთ, რომ რუსეთია პასუხსიმგებელი ყველაფერ იმაზე, რაც ხდება აფხაზეთში და ე.წ. სამხერთ ოსეთში.

საკმაოდ პრობლემატურია, თითქოს რაღაც დამატებითი არგუმენტი მივეცით. ვერაფერი მოვიგეთ, რუსეთს კი სამომავლოდ სალაპარაკოდ დამატებითი არგუმენტი მივცით. ამის შემდეგ რუსეთთან მიმართებით რაღაც პრეტენზია რომ გაგვიჩნდება, ის ყოველთვის გვეტყვის, მე რატომ მელაპარაკებით, წადით და აფხაზებს და ოსებს ელაპარაკეთ, მთელ ამ პროცესში ის პასუხისმგებლობას გაემიჯნა და სამწუხაროდ ამის საფუძველი ჩვენმა პრემიერ-მინისტრმა შეუქმნა.

რუსეთმა შეიძლება პრემიერის განცხადება გამოიყენოს საკუთარი ინტერესებისთვის, ანუ თქვას, რომ დასხედით ილაპარაკეთ, ქურდად დაგიჯდებით, მოგისმენთ და რაღაც მედიატორი გავხდები. ერთია ჩვენი სურვილი, გაუმჯობესდეს, რუსების სურვილი რა არის? ფორმატის შეცვლა ხომ შეთანხმებით ხდება“, - აღნიშნავს გია ხუხაშვილი „ნიუპოსტთან“ საუბრისას.