"სითი პარკთან" გაწყვეტილი ხელშეკრულება მოქალაქეებს აზარალებს? - ოპოზიცია კალაძისგან განმარტებეას ითხოვს

პოლიტიკა - 11:11, 13 Mar, 2018

2732

"ნაციონალური მოძრაობის" ერთ-ერთი ლიდერი, ლევან ხაბეიშვილი დედაქალაქის მერიის მიერ "სითი პარკთან" ხელშეკრულების გაწყვეტას მიესალმება, თუმცა იქვე ამბობს, რომ კახა კალაძემ შემდეგი ნაბიჯების შესახებ მოსახლეობას ზუსტი ინფორმაცია უნდა მიაწოდოს.

როგორც "ნიუპოსტს" ხაბეიშვილმა განუცხადა, მსგავსი გადაწყვეტილებები ფორსმაჟორულ რეჟიმში არ უნდა მიიღებოდეს:

"ძალიან კარგია, რომ "სითი პარკთან" ხელშეკრულება გაუქმდა, მაგრამ შემდეგი ნაბიჯების შესახებ საზოგადოების ინფორმირება მნიშვნელოვანია. აღნიშნულ კომპანიასთან, რომ კონტრაქტი უნდა გაწყვეტილიყო, ამაზე ჯერ კიდევ ნარმანიას დროს ვსაუბრობდით. მთავარი კითხვაა, რა დაუჯდება თბილისელებს ეს სიამოვნება.

ასევე საინტერესოა, როგორ მოახერხებს კალაძე კოლოსალური თანხების გადახდას და ხომ არ დააწვება ეს გადასახადი თბილისელების ჯიბეს.

მერიამ ასევე უნდა გასცეს პასუხი შეკითხვას - თუ "სითი პარკი" არ იქნება და შემოვა სხვა კომპანია, რითი იხეირებს მოსახლეობა, ანდა, ამ გადაწყვეტილებით პარკირების პრობლემა იხსნება? არ გამოვა ისე, რომ აი "სითი პარკი" გავიდა და პარკირების პრობლემა მოიხსნებაო.

ძალიან მნიშვნელოვანია მერიას გაწერილი ჰქონდეს ყველა შემდეგი ნაბიჯი. წარმოუდგენელია ასეთი გადაწყვეტილება ფორსმაჟორულ სიტუაციაში მიიღო. თუ ნამუშევარი აქვს, თუ იცის შემდეგი ნაბიჯები რა იქნება, მაშინ თბილისელებმა უნდა იცოდეს "სითი პარკის" გასვლის შემდეგ, როგორ დარეგულირდება თბილისში პარკირების პრობლემა"- აღნიშნა ხაბეიშვილმა.

ხელისუფლების ოპონენტი კალაძის განცხადებას, მერიაში დაგროვილი კორუფციის შესახებ გავრცელებულ ინფორმაციას უკავშირებს.

"დღევანდელ განცხადებას ვუკავშირებ იმ პრობლემებს, რომელშიც კახი კალაძეა გახვეული, რამდენიმე დღის წინ, კორუფციის ბრალდებით კონკრეტული დეპუტატი დაუჭირეს, გაჩეჩილაძისთვის გადარიცხული თანხის გამოც სკანდალშია. რახან, სერიოზულ კორუფციაშია გახვეული, ხომ არ არის ეს განცხადება გაკეთებული ამ პრობლემების გადასაფარად?"- თქვა ლევან ხაბეიშვილმა.

თბილისის მერია კომპანია „სითი პარკთან“ დადებულ ხელშეკრულებას 10 აპრილიდან წყვეტს. ამის შესახებ თბილისის მერმა კახა კალაძემ ბრიფინგზე განაცხადა.

აღნიშნული გადაწყვეტილების მიზეზად დედაქალაქის მერმა კომპანიის მხრიდან უპასუხისმგებლობა და საჯარო უფლებამოსილებების არასათანადოდ შესრულება დაასახელა.

კონტრაქტის გაუქმების შემდეგ, „სითი პარკის“ ფუნქციებს, პარკირების ახალი სისტემის ჩამოყალიბებამდე, თბილისის სატრანსპორტო კომპანია განახორციელებს.