"რუსეთს ჟენევის ფორმატის გაძლიერება არ აწყობს, ეცდება რუტინად აქციოს“

"რუსეთს ჟენევის ფორმატის გაძლიერება არ აწყობს, ეცდება რუტინად აქციოს“ - თორნიკე შარაშენიძე

პოლიტიკა - 12:16, 13 Mar, 2018

1579

„მოსკოვში ყურდღებით გაეცნენ საქართველოს პრემიერ-მინისტრის, გიორგი კვირიკაშვილის 9 მარტის მიმართვას. კმაყოფილებით აღვნიშნავთ, ორმხრივი ნორმალიზაციის პროცესის გაგრძელებასა და გაღრმავებასთან დაკავშირებით წერილში გამოხატულ სულისკვეთებას. ეჭვი არავის უნდა ეპარებოდეს, რომ რუსეთი, როგორც ადრე, დაინტერესებულია მეზობელ საქართველოსთან ურთიერთობის გაჯანსაღებით და მზადაა ამ საკითხში იმდენად შორს წავიდეს, რამდენადაც ამისთვის თბილისი იქნება მზად“, - რუსეთის საგარეო საქმეთა სამინისტრომ საქართველოს პრემიერ-მინისტრის 9 მარტის განცხადებას უპასუხა. ლავროვის უწყება დადებითად აფასებს ჟენევის დისკუსიების ფორმატში გიორგი კვირიკაშვილის ჩართვის ინიციატივას.

კვირიკაშვილის განცხადებას და რუსეთის საგარეო უწყების პასუხს კრიტიკული შეფასებები მოჰყვა ოპოზიციის რიგებში.

„ნიუპოსტი“ საკითხის შესაფასებლად ექსპერტ თორნიკე შარაშენიძეს დაუკავშირდა, რომელიც აღნიშნავს, რომ რუსეთს არ აწყობს ჟენევის მოლაპარაკებების ფორმატის ცვლილება და რუსეთის საგარეო უწყების განცხადება იმავე შინაარსისაა, რაც უკანასკნელი 6 წლის განმავლობაში გვესმის:

„ფორმატის შეცვლაზე მე მგონი მარტივად არ არის საქმე და არც შეიძლება მარტივად იყოს. შეუძლია კვირიკაშვილს ჩავიდეს იქ, შეუძლია ჩავიდეს სოზარ სუბარიც და ეს უკვე ნიშნავს იმას, რომ ამაზე მეტად ფორმატის ამაღლება ჩვენი მხრიდან არ შეიძლება, მაგრამ ეს არ ნიშნავს იმას, რომ ავტომატურად რუსეთის მხრიდან გამოიქცევა ვინმე, თუნდაც ლავროვი, ასე მარტივად არ იქნება. რუსეთს არაფერში აწყობს ჟენევის ფორმატის გაძლიერბა, რადგან ჟენევის ფორმატში საქართველო მარტო არ ზის რუსეთთან.

რუსეთს ამ ფორმატის გაუქმება უნდა, მაგრამ ვერ აუქმებს, ასე რომ მაქსიმალურად გააჭიანურებს და შეეცდება, რომ ფორმატი იქცეს ჩვეულებრივ რუტინად, ფაქტობრივად ასეც არის ქცეული. აქედან ვინც არ უნდა ჩავიდეს, მას სულ არ აინტერესებს.

რუსეთის საგარეო საქმეთა სამინისტროს განცხადების შინაარსი იგივეა, რაც მისგან ბოლო ექვსი წელია გვესმის. იგი გვეუბნება, თუ გინდათ დიპლომატიური ურთიერთობის აღდგენა აღადგინეთ, ხელს არ გიშლით, ამბობს რომ მათი ბრალი არ არის, რადგან საქართველომ გაწყვიტა, თუ გინდათ ლაპარაკი აფხაზეთთან და ოსეთთან ისაუბრეთ, ჩვენ რა შუაში ვართ, თქვენი პრობლემა და თქვენი კონფლიქტიაო, ასე ამბობს 5-6 წელია. ეს განცხადებაც იგივე შინაარსისაა“, - აცხადებს თორნიკე შარაშენიძე „ნიუპოსტთან“ საუბრისას.