ოკუპირებული ცხინვალის ციხეში გაურკვეველ ვითარებაში მოკლული ქართველი სამხედრო - რეზელოუცია, რომელმაც არჩილ ტატუნაშვილის მკვლელობის გამო ოკუპანტთა ქმედება უნდა დაგმოს, კვლავ არ არის შემუშავებული.

საპარლამენტო უმრავლესობის წევრების განცხადებით, მნიშვნელოვანია რეზოლუციის ტექსტზე კონსესუსის მიღწევა საპარლამენტო ოპოზიციასთან. პარლამენტის იურიდიულ საკითხთა კომიტეტის თავმჯდომარე ეკა ბესელია აცხადებს, რომ რეზოლუციის შემუშავების პროცესში სანქციების ნაწილის შემუშავება სამართლებრივი საკითხია, რასაც სიზუსტე სჭირდება:

„სამართლებრივ საკითხებს სჭირდება ცოტა უფრო მეტი სიზუსტე და გაცილებით უფრო სხვა სტანდარტები, ვიდრე პოლიტიკურ შეფასებას. პოლიტიკური შეფასების ნაწილში მე ვფიქრობ, რომ ეს კონსულტაციები, რომელიც გრძელდება დასრულდება საბოლოოდ ალბათ შეჯერებით, სანქციების ნაწილი არის სისხლის სამართლებრივი საკითხი. სისხლის სამართლებრივ საკითხებს როცა ვეხებით, მას სხვა ტიპის სიზუსტე სჭირდება და სხვა ტიპის საკანონმდებლო დათქმებთან მიახლოება. ვფიქრობ, საჭიროა ეს განწყობა, რომ ერთი ტექსტი იყოს მხარდაჭერილი,“-აცხადებს ბესელია.

საპარლამენტო უმცირესობის მოთხოვნაა, რეზოლუციის ტექსტს სანქციებთან ერთად დაემატოს ე.წ. ტატუნაშვილი-ოთხოზორიას სია:

„ევროპული საქართველოს“ ინიციატივა სანქციებთან დაკავშირებით, არის ერთადერთი ქმედითი ნაბიჯი რეზოლუცია ერთის მხრივ შეიძლება შეიცავდეს შეფასებებს მოსაზრებებს და ჰქონდეს დეკლარაციული ხასიათი, მაგრამ კონკრეტული ზომების გარეშე ჩვენ ვფიქრობთ, რომ ეს რეზოლუცია არ იქნება ქმედითი, ამიტომ ვთავაზობთ ჩაიდოს კონკრეტული პირების სია და კონკრეტულ სანქციები ამ პირებზე მომავალში ამ სანქციების გამკაცრება ამ პირთა რაოდენობის გაზრდა თუ ამგვარი შემთხვევები გაგრძელდება. ამგვარი ქმედითი ნაბიჯების გარეშე ფარატინა რეზოლუციის მიღება არ არის საკმარისი,“-ოთარ კახიძე.