,,გზავნილი ქართული საზოგადოებისთვის ეს არის... ჩვენი დასავლელი მეგობრები დიდხანს აღარ დააყოვნებენ" - ლევან ალაფშივილი ევროპარლამენტარის განცხადებაზე

პოლიტიკა - 15:52, 12 Mar, 2018

2255

ვიზალიბერალიზაციის ამოქმედებიდან ერთი წელი გადის, უვიზო რეჟიმისთვის შექმნილი საფრთხეების შესახებ კი უკვე დიდი ხანია საუბრობენ. ევროკავშირისა და საქართველოს ურთიერთობებზე საკმაოდ მკაცრი განცხადება გააკეთა ლიტველმა ევროპარლამენტარმა პეტრას აუსტრევიჩუსმა, რომელმაც საქართველოს ხელისუფლებას მოუწოდა არ ჰქონდეს სელექციური მიდგომა რეფორმებისადმი, რადგან ამ გზით ქვეყანა ნაბიჯს უკან გადადგამს.

საკითხს „ნიუპოსტთან“ კონსტიტუციონალისტი ლევან ალაფიშვილი აფასებს. იგი ევროპარლამენტარის განცხადებას საზოგადოებისადმი გზავნილად მიიჩნევს და აღნიშნავს, რომ იმ შემთვევაში თუ საზოგადოება შეეგუება ხელისუფლების მხრიდან გარკვეულ გადაცდომებს, ქვეყანა მეგობრების გარეშე დარჩება დემოკრატიულ გზაზე სვლისას:

„ამ განცხადებას უფრო მივიჩნევ გზავნილად საქართველოს მოქალაქეებისადმი. ჩვენ გვყავს მეგობრები და მეგობარი პირველ რიგში ნიშნავს იმას, რომ ის ზრუნავდეს შენთან ერთად შენს გამოსწორებაზე, ან შენს განვითარებაზე, სახელმწიფოებრიობაზე როცა ვსაუბრობთ. თუ ეს ასე არ არის, მისი რომელიმე ნაწილი, ამ შემთხვევაში მმართველი პოლიტიკური ძალა თუ არ იქცევა ისე, რომ სახელმწიფო განვითარდეს და მეგობრებთან ერთად გააგრძელოს დემოკრატიული გზა, ბუნებრივია ამ შემთხვევაში, დემოკრატიული ერთადერთი გზა რჩება, პოლიტიკური გზით დემოკრატიულ ჩარჩოებში ამ ყველაფრის შეცვლა. გზავნილი ქართული საზოგადოებისთვის სწორედ ეს არის, რომელსაც ბოლო პერიოდში არა ერთი ჩვენი სტრატეგიული პარტნიორი აცხადებს - დემოკრატიული განვითარება არის არა ერთი რომელიმე პოლიტიკური ძალის ამოცანა, არამედ მთლიანი საზოგადოების მეცადინეობის საგანი. შესაბამისად, ამ შემთხვევაში თუ ჩვენთვის მისაღები იქნება ამ სტილით მმართველი პოლიტიკური ძალა, ჩვენი მეგობრებიც დიდხანს აღარ დააყოვნებენ, გვეტყვიან თუ ეს თქვენთვის მისაღებია, შეგიძლიათ გააგრძელოთ ეს გზა, მაგრამ მეგობრების გარეშე. ევროასოცირება და რეფორმები დემოკრატიულ ოჯახში დასამკვიდრებლად, იმისთვის, რომ საზოგადოება გახდეს დემოკრატიული, არ არის რომელიმე ევროპული სახელმწიფოსთვის აქტუალური, ეს მისი პრობლემა არ არის, შესაბამისად, თუ ეს ქართულ საზოგადოებას არ უნდა, შეიძლება რომელიმე ჩვენი მეგობრისთვის სამწუხარო ფაქტი იყოს, მაგრამ იყოს მოცემულობა“, - აცხადებს ლევან ალაფიშვილი.