უნდა ვისაუბროთ ჟენევის ფორმატის ცვლილებაზე

უნდა ვისაუბროთ ჟენევის ფორმატის ცვლილებაზე - სოზარ სუბარი

პოლიტიკა - 10:51, 12 Mar, 2018

1604

ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის, სოზარ სუბარის თქმით, საჭიროა რომ ჟენევის ფორმტში გარკვეული ცვლილებები შევიდეს. მინისტრის თქმით, საჭიროა რომ შეხვედრა უფრო მაღალ დონეზე ხდებოდეს. აღნიშნული განცხადება სუბარმა არჩილ ტატუნაშვილის ცხედრის გადმოსვენების საკითხზე საუბრისას გააკეთა. მისი თქმით მოლაპარაკებებში ჩართულია ყველა ოფიციალური უწყება.

„უნდა ვისაუბროთ ჟენევის ფორმატის ცვლილებაზე, იმიტომ, რომ ჟენევის ფორმატით თავიდანვე მე ვფიქრობ, არაეფექტურად იქნა ჩაფიქრებული თუ განხორციელებული. საჭიროა, რომ უფრო მაღალი დონის იქნას შეხვედრა. ქვეყნის პირველი პირების დონეზე იქნებოდა სასურველი,“-განაცხადა სოზარ სუბარმა.

2008 წლის აგვისტოს ომის შემდეგ საქართველოსა და რუსეთს შორის შეიქმნა ჟენევის საერთაშორისო მოლაპარაკებების ფორმატი. აღნიშნული დისკუსიების ჩამოყალიბების გადაწყვეტილება მიღებულ იქნა 2008 წლის 12 აგვისტოს ცეცხლის შეწყვეტის შეთანხმების შესაბამისად. მას შემდეგ წელიწადში ტარდება 4 რაუნდი.

ჟენევის საერთაშორისო მოლაპარაკებების ფარგლებში იმართება ორი სამუშაო ჯგუფის შეხვედრა, სადაც მოლაპარაკებების მონაწილეები ინდივიდუალური სტატუსით არიან წარმოდგენილი. პირველი სამუშაო ჯგუფის ფარგლებში განიხილება საქართველოს ოკუპირებულ ტერიტორიებზე უსაფრთხოებისა და სტაბილურობის საკითხები, ხოლო მეორე სამუშაო ჯგუფში – აფხაზეთისა და ცხინვალის რეგიონებში ადამიანის უფლებებისა და ჰუმანიტარული კუთხით არსებული მდგომარება, ასევე იძულებით გადაადგილებულ პირთა და ლტოლვილთა საკუთარ საცხოვრებელ სახლებში უსაფრთხო და ღირსეულ დაბრუნებასთან დაკავშირებული საკითხები. მოლაპარაკებები იმართება ევროკავშირის, გაერო-სა და ეუთო-ს თანათავმჯდომარეობით და საქართველოს, რუსეთის ფედერაციისა და ამერიკის შეერთებული შტატების მონაწილეობით. სამუშაო ჯგუფის შეხვედრებს ესწრებიან აგრეთვე ყოფილი სამხრეთ ოსეთის ავტონომიური ოლქის დროებითი ადმინისტრაციის ხელმძღვანელი და აფხაზეთის ავტონომიური რესპუბლიკის მთავრობის თავმჯდომარე ისევე, როგორც ცხინვალისა და სოხუმის საოკუპაციო რეჟიმების წარმომადგენლები.

ამ ფორმატში საქართველოს დელეგაციას საგარეო საქმეთა მინისტრის მოადგილე ხელმძღვანელობს.