„ერთიანი ნაციონალური მოძრაობის“ წევრები ოკუპირებული ცხინვალის ციხეში გაურკვეველ ვითარებაში მოკლული ქართველი სამხედროს ოჯახში იმყოფებოდნენ. მათ არჩილ ტატუნაშვილის ოჯახს მიუსამძიმრეს.

ხატია დეკანოიძე გიორგი კვირიკაშვილის განცხადებას გამოეხმაურა, რომელიც პრემიერმა რუსეთის ხელისუფლების მიმართ გააკეთა და განაცხადა, რომ პრემიერ-მინისტრი უნდა გადადგეს.

„მე მინდა, პირდაპირ ვუთხრა საქართველოს პრემიერმინისტრს, რომ ის უნდა გადადგეს, როგორც საქართველოს სამარცხვინო პრემიერმინისტრი, გადადგეს იმიტომ, რომ თითოეული ქართველი ბატონ გიორგისთან და ქალბატონ რუსუდანთან ერთად არის შეურაცხყოფილი იმ განცხადებით, რომელიც გავრცელდა გუშინ და ეს არის კეკლუცობის და კუდის ქიცინის განცხადება რუსეთის ფედერაციის წინაშე. იმ ფონზე, როდესაც ცხედარს არ გვაძლევენ და ცინიკურ შეფასებებს აკეთებს რუსეთის ფედერაციის ხელისუფლება და სეპარატისტული ხელისუფლება, ამ ფონზე კვირიკაშვილს არ აქვს უფლება, იყოს საქართველოს უმაღლესი თანამდებობის პირი,“ - განაცხადა დეკანოიძემ.