თბილისის 163-ე ბაღის ყოფილი დირექტორის ქმედებების გამო სისხლის სამართლის საქმე დოკუმენტების გაყალბების მუხლით აღიძრა. გავრცელებული ინფორმაციით, სოფიო სიყმაშვილი დოკუმენტებზე საკუთარი მოადგილისა და დაღუპული თანამშრომლის ნაცვლად აწერდა ხელს, ამის შესახებ კი ინფორმაცია ჰქონდა ბაღების სააგენტოს მაშინდელ ხელმძღვანელს. „ნაციონალურ მოძრაობაში“ აცხადებენ, რომ საქმესთან დაკავშირებით დღეს ისანი-სამგორის პოლიციაში გამოკითხვაზეა დაბარებული ბაღების მართვის სააგენტოს ყოფილი ხელმძღვანელი, თუმცა თემურ თორდინავა საგამოძიებო უწყებაში დაბარებას არ ადასტურებს.საქმეში ფიგურირებს ფარული სატელეფონო ჩანაწერიც, რომელიც რამდენიმე თვის წინ „ნაციონალურმა მოძრაობამ“ გაავრცელა.

„საქმე აღძრულია ისეთ საქმეზე, სადაც თავად თემურ თორდინავა და მისი სატელეფონო ჩანაწერი ფიგურირებს, უშუალო შემხებლობაშია ეს ადამიანი ამ საქმესთან. რადგან შს სამინისტრომ ჩათვალა, რომ საქმე უნდა აღიძრას, ესე იგი მტკიცებულებები და ფაქტები არის იმდენად რეალური, რომ საქმის არაღძვრა ფაქტობრივად შეუძლებელი გახდა.“-განაცხადა ენმ-ს წევრმა ლევან ხაბეიშვილმა.