საქართველოს პრემიერ-მინისტრის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე გიორგი კვირიკაშვილის განცხადებაზე, რომლის ფარგლებშიც იგი რუსეთის ხელისუფლებას მიმართავს, აფასებს.

აბაშიძე აცხადებს, რომ ამ განცხადებით პრემიერ-მინისტრმა რთული ნაბიჯი გადადგა:

„ეს დიდი პასუხისმგებლობის მქონე სახელმწიფო მოღვაწის განცხადებაა. უპირველეს ყოვლისა, მხედველობაში მაქვს ქვეყნისა და საკუთარი ხალხის წინაშე პასუხისმგებლობა, რომელიც ყველაფერზე, ნებისმიერ პოლიტიკურ კონიუქტურაზე მაღლა მათ ინტერესებს აყენებს. კვირიკაშვილმა ამ განცხადებით ნაბიჯი გადადგა არა მხოლოდ ტატუნაშვილთან დაკავშირებული უმძიმესი პრობლემის მოსაგვარებლად, არამედ რუსეთის მიმართ ჩვენი ქვეყნის უმნიშვნელოვანეს საკითხებზე კონკრეტული, გონივრული შეთავაზება გააჟღერა და მისი პირადი მონაწილეობით, ჟენევის დისკუსიების გააქტიურების მზადყოფნა გამოთქვა, რაზეც კომენტარი ადრეც გაუკეთებია. გარდა ამისა, პრემიერ-მინისტრმა პირდაპირი დიალოგის დაწყებაზე კიდევ ერთხელ გააკეთა შეთავაზება აფხაზებისა და ოსების მიმართ. ალბათ, განცხადებაზე რაღაც რეაქცია იქნება. ამის წინასწარმეტყველება რთულია, მაგრამ ვფიქრობ, რომ პრემიერმა ის რთული ნაბიჯი გადადგა, რომელიც უნდა გადაედგა“, – განაცხადა აბაშიძემ.