პეტროზავოდსკის საქალაქო ოლქის ადმინისტრაციის კულტურის მართვის სამსახურის მიერ გავრცელებულ ინფორმაციას საქართველოში დიდი ვნებათაღელვა მოჰყვა.

საუბარია ფორუმზე: „რუსეთი და საქართველო: ერთმანეთისკენ“, რომელიც რუსეთში, კარელიის რესპუბლიკის დედაქალაქ პეტროზავოდსკში ტარდება.

ოფიციალური ინფორმაციის თანახმად, ღონისძიებაში მონაწილეობას მიიღებენ ახალგაზრდები ბათუმიდან და რუსთავიდან.

"ნიუპოსტი" ბათუმის მერიას დაუკავშირდა, სადაც აღნიშნეს, რომ პეტროზავოდსკის საქალაქო ოლქის ადმინისტრაციის კულტურის მართვის სამსახურის მიერ გავრცელებული ინფორმაცია სიმართლეს არ შეესაბამება.

უწყებაში აღნიშნავენ, დეზინფორმაციაა ისიც, რომ პროექტის პარტნიორები და ერთ-ეღტი დამფინანსებლები არიან.

"ერთ-ერთ რუსულ ვებგვერდზე გავრცელებული ინფორმაცია, თითქოს ბათუმის მერია პარტნიორი და დამფინანსებელია პროექტის - ,,რუსეთი და საქართველო: ერთმანეთთან შესახვედრად“, არ შეესაბამება სიმართლეს.

ბათუმის მერია ემიჯნება მსგავსი ტიპის დეზინფორმაციას.

მერიის მხრიდან დაუყოვნებლივ გატარდება შესაბამისი ზომები ვებგვერდზე გავრცელებული მცდარი ინფორმაციის შესწორების მიზნით.

აქვე განვმარტავთ, რომ ბათუმის მერია არაა დამეგობრებული ქალაქ პეტროზავოდსკთან და არც კარელიის რესპუბლიკასთან აქვს რაიმე ტიპის ურთიერთობა"- აცხადებენ ბათუმის მერიაში.