"რუსეთი და საქართველო: ერთმანეთისკენ" - პუტინის ფონდის მხარდაჭერით კარელიაში ქართველ ახალგაზრდებს ელოდებიან

პოლიტიკა - 19:05, 06 Mar, 2018

3903

კარელიის რესპუბლიკის დედაქალაქ პეტროზავოდსკში 11 აპრილიდან 10 მაისის ჩათვლით გაიმართება ფორუმი სახელწოდებით "რუსეთი და საქართველო: ერთმანეთისკენ", ნათქვამია პეტროზავოდსკის საქალაქო ოლქის კულტურის მართვის ვებ-გვერდზე გამოქვეყნებულ განცხადებაში.

კულტურულ-საგანმანათლებლო პროექტი ორგანიზებულია კარელიის რეგიონული საზოგადოებრივი ორგანიზაციის Театр поэзии КРЕДО („პოეზიის თეატრი კრედო") ინიციატივითა და რუსეთის პრეზიდენტის გრანტების ფონდის მხარდაჭერით. პარტნიორები არიან ბათუმის მერია და ქალაქ რუსთავის რუსული კულტურის საზოგადოება „წყარო".

ფორუმის დევიზია — Мы разные, но сильны единством! („ჩვენ განსხვავებულნი ვართ, მაგრამ ძლიერნი ვართ ერთიანობით!"). ორგანიზატორების განცხადებით, პროექტი საშუალებას იძლევა, მოხდეს კარელიისა და საქართველოს ქალაქების ახალგაზრდების კონსოლიდაცია ტოლერანტობის, მშვიდობისა და თანხმობის იდეების გარშემო, ასევე გამტკიცდეს ერთა შორის დიალოგი.

ფორუმის ფარგლებში ქართველი ახალგაზრდები ბათუმიდან და რუსთავიდან კარელიაში — პეტროზავოდსკში, კონდოპოგასა და მედვეჟიეგორსკში ქართულ ცეკვებსა და თეატრალურ ხელოვნებას წარადგენენ.

ასევე, ფორუმის ფარგლებში, 13 აპრილიდან 10 მაისის ჩათვლით პეტროზავოდსკში დაგეგმილია კარელიის რესპუბლიკის ხელოვნების დამსახურებული მოღვაწის ბადრი თოფურიას გამოფენა ესენინის სახელობის მოსკოვის სახელმწიფო მუზეუმთან და საქართველოს გამოყენებითი ხელოვნების ოსტატებთან ერთად.

პეტროზავოდსკის ადმინისტრაციის კულტურის განყოფილების ხელმძღვანელის სერგეი სოლოვიოვის თქმით, ეს პროექტი “საქართველოში რუსული კულტურის დღეების“ სერიის გაგრძელებაა, რომელიც 2014 წელს თბილისში, ბათუმსა და რუსთავში ჩატარდა, ფონდ „Русский мир“-ის მხარდაჭერით. სოლოვიოვის თქმით „ ამ წლის მაისში პეტროზავოდსკის შემოქმედებითი დესანტი კვლავ ეწვევა სტუმართმოყვარე საქრათველოს და მზიან აჭარაში წარადგენს კარელიის მუსიკალურ, ლიტერატურულ და თეატრალურ ტრადიციებს“