პარლამენტში არჩილ ტატუნაშვილის მკვლელობასთან დაკავშირებით 2 რეზოლუციის განხილვა მიმდინარეობს. პირველი რეზოლუცია საპარლამენტო უმრავლესობის ლიდერის, არჩილ თალაკვაძის მიერ წარმოდგენილი, სახელწოდებით „საქართველოს პარლამენტის რეზოლუცია ოკუპირებული სამხრეთ ოსეთის/ცხინვალის რეგიონში საქართველოს მოქალაქე არჩილ ტატუნაშვილის სიცოცხლის ხელყოფის თაობაზე“, ხოლო მეორეს ინიციატორი საპარლამენტო უმცირესობაში შემავალი ფრაქციები „ევროპული საქართველო“, ევროპული საქართველო-მოძრაობა თავისუფლებისთვის“ და „ევროპული საქართველო - რეგიონებია“ უმცირესობის რეზოლუცია წარმოდგენილია სახელწოდებით „რუსეთის ფედერაციის საოკუპაციო რეჟიმის პირობებში საქართველოს მოქალაქეეების გატაცებასა და მკვლელობაში ეჭვმიტანილ პირთა „ოთხოზორია-ტატუნაშვილის სიაში“ შეყვანის და მათი სანქცირების შესახებ“.

საკუთარი წინადადებები წამოაყენეს „ნაციონალური მოძრაობის“ წარმომადგენლებმაც, ისინი მოითხოვენ, რომ რეზოლუციაში ჩაიწეროს აბაშიძე-კარასინის ფორმატის შეწყვეტაც, ვიდრე არ მოხდება აღნიშნული ფაქტის გამოძიება. ენმ-ს თქმით მომავალში ეს ფორმატი საერთოდ უნდა შეიცვალოს.

„ეს პირველ რიგში, შეეხება რუსეთისთვის სანქციების დაკისრების საკითხზე დაუყოვნებლივ კონსულტაციების დაწყებას საერთაშორისო თანამეგობრობასთან. ასევე, აბაშიძე-კარასინის ფორმატის შეწყვეტა მანამ, სანამ არ დადგება სისხლის სამართლის პასუხისმგებლობა საქართველოს მოქალაქეების მკვლელების, ოთხოზორიასა და ტატუნაშვილს ვგულისხმობ, და მომავალში ამ ფორმატის სრულიად შეცვლა, რაშიც იგულისხმება ის, რომ ფორმატის მანდატი უნდა გახდეს გამჭვირვალე, ეს მანდატი უნდა დაამტკიცოს პარლამენტმა და მომლაპარაკებელი პირი ასევე უნდა განისაზღვროს პარლამენტის თანხმობით“- განაცხადა „ნაციონალური მოძრაობის“ წევრმა, სალომე სამადაშვილმა.