"მზად ვართ მივიღოთ შეჯერებული გადაწყვეტილება"- თალაკვაძე ტატუნაშვილის მკვლელობასთან დაკავშირებით საერთო რეზოლუციაზე

პოლიტიკა - 12:56, 06 Mar, 2018

913

პარლამენტში არჩილ ტატუნაშვილის მკვლელობასთან დაკავშირებით 2 რეზოლუციის განხილვა მიმდინარეობს. პირველი რეზოლუცია საპარლამენტო უმრავლესობის ლიდერის, არჩილ თალაკვაძის მიერ წარმოდგენილი, სახელწოდებით „საქართველოს პარლამენტის რეზოლუცია ოკუპირებული სამხრეთ ოსეთის/ცხინვალის რეგიონში საქართველოს მოქალაქე არჩილ ტატუნაშვილის სიცოცხლის ხელყოფის თაობაზე“, ხოლო მეორეს ინიციატორი საპარლამენტო უმცირესობაში შემავალი ფრაქციები „ევროპული საქართველო“, ევროპული საქართველო-მოძრაობა თავისუფლებისთვის“ და „ევროპული საქართველო - რეგიონებია“ უმცირესობის რეზოლუცია წარმოდგენილია სახელწოდებით „რუსეთის ფედერაციის საოკუპაციო რეჟიმის პირობებში საქართველოს მოქალაქეეების გატაცებასა და მკვლელობაში ეჭვმიტანილ პირთა „ოთხოზორია-ტატუნაშვილის სიაში“ შეყვანის და მათი სანქცირების შესახებ“. არ არის გამორიცხული რომ უმრავლესობა და უმცირესობა საერთო რეზოლუციაზე შეჯერდეს:

„ჩვენი მიზანი არის მივიღოთ ერთიანი ძლიერი რეზოლუცია, სადაც მკაცრი შეფასებები მიეცემა არჩილ ტატუნაშვილისა და გიგა ოთხოზორიასთან დაკავშირებით მძიმე დანაშაულებს, ასევე იქნება კონკრეტული მოთხოვნები და ქმედებები, რომელიც უნდა მოჰყვეს ამ ფაქტს, ეს არის გამოძიების ჩატარება, საერთაშორისო მონიტორინგის მექანიზმის დაშვება ოკუპირებულ ტერიტორიაზე და რა თქმა უნდა ეს არის პირველ რიგში ცხედრის დაუყოვნებლივი გადმოცემა ოჯახისათვის. კონსულტაციები უკვე დაწყებულია, ჩვენ მზად ვართ ნებისმიერ ოპოზიციურ პარტიებს, მათ რეკომენდაციებს და მოსაზრებებს მოვუსმინოთ და მივიღოთ შეჯერებული გადაწყვეტილება.“- განაცხადა არჩილ თალაკვაძემ.