"ვიზალიბერალიზაციის შეჩერების მექანიზმის საკითხი დღის წესრიგში არაა, ეს ტექნიკური მისიაა"- გახარია გერმანიის მთავრობის წარმომადგენლების ვიზიტზე

პოლიტიკა - 12:08, 06 Mar, 2018

1119

გერმანიის შინაგან საქმეთა ფედერალური სამინისტროს მიგრანტთა დაბრუნების შტაბის ხელმძღვანელის, დოქტ. კრისტიან კლოსის და გერმანიის საგარეო საქმეთა სამინისტროს რწმუნებულის ლტოლვილთა და მიგრაციის საკითხებში, ელჩი ანეტ გიუნთერის საქართველოში ვიზიტს საქართველოს შს მინისტრი ეხმაურება. გიორგი გახარიას განცხადებით, ევროკავშირის რამდენიმე ქვეყანა შეშფოთებას გამოთქვამს უვიზო რეჟიმის ამოქმედების შემდეგ საქართველოდან თავშესაფრის მაძიებელთა რიცხვის გაზრდის გამო, თუმცა მინისტრის თქმით, ვიზალიბერალიზაციის შეჩერების მექანიზმის ამოქმედების საკითხი არ განიხილება.

„შეჩერების მექანიზმზე არ იქნება საუბარი, ეს გახლავთ ტექნიკური მისია. იქნება ტექნიკური შეხვედრა, სადაც შსს-ში, როგორც სხვა უწყებებში, საუბარი იქნება იმ ღონისძიებებზე, რომელსაც საქართველოს მთავრობა გეგმავს, რათა ამ გამოწვევას უპასუხოთ.

ძირითადი პრობლემატური საკითხი არის თავშესაფრის მოთხოვნების რაოდენობის ზრდა გერმანიაში და ევროპის რამდენიმე ქვეყანაში.

გარდა ამისა, კვირის ბოლომდე ჩვენ გვექნება ვიზიტი ევროპოლში, სადაც უკვე კონკრეტულ მექანიზმებზე გვექნება საუბარი, ოპერატიულ დონეზე ინფორმაციის გაცვლის შესახებ, რაც იქნება ძალზე სერიოზული არგუმენტი გამოწვევებზე პასუხისთვის.

საკითხი შეჩერების ამუშავების მექანიზმზე არ დგას, ეს საკითხი დღის წესრიგში არ არის. არის რამდენიმე ქვეყანაში შეშფოთება, რომ თავშესაფრის მოთხოვნის რაოდენობა არის გაზრდილი. უნდა გვესმოდეს ერთი რამ, ამ რაოდენობის ზრდას ველოდით, ეს არ არის დიდი ციფრები, თუმცა კონკრეტული პროცენტული ზრდის ტენდენცია არსებობს. ჩვენ გვაქვს გეგმა, ნაწილობრივ გაცხადებული, რომელსაც ექნება პრევენციის ძალა, რათა ამ გამოწვევას ვუპასუხოთ.“ – განაცხადა გახარიამ.