"არ მახსოვს, რაზე ვსაუბრობდით" - მაღლაფერიძე გავრცელებულ ფოტოს ,,სხვის სუფრებზე" მიყურადების სენს უწოდებს

პოლიტიკა - 17:52, 05 Mar, 2018

1243

საზოგადოებრივი მაუწყებლის“ გენერალური დირექტორი P.S-ისთვის „ევროუპული საქართველოს“ მიერ მიწოდებულ ფოტოს ეხმაურება. მისი თქმით, ფოტოზე ასახულ არც ერთ ადამიანს არ ეხება ბორდის წევრის არჩევის საკითხის გარჩევა. მაღლაფერიძე აღნიშნულ შეხვედრას საიდუმლოს არ უწოდებს და აცხადებს, რომ ეს შეხვედრა ხალხმრავალ ადგილზე გაიმართა:

„ძაღლის კუდი არ გასწორდება. როგორც ჩანს, სხვისი საუბრებისადმი, სხვის სუფრებზე, სხვის საწოლ ოთახებზე მიყურადება ისეთი სენია, რომლისგანაც ძალიან უჭირთ ადამიანებს გათავისუფლება. მე არ ვურჩევდი ამ მიმართულებით დაზიანებული წარსულის ადამიანებს, ისევ ამ ნიშნით შეახსენონ საზოგადოებას თავი.

რაც შეეხება, მაპატიეთ ამ სიტყვისთვის, სისულელეზე როგორ გავმართეთ „საიდუმლო შეხვედრა“ შუადღისით, ქალაქის ცენტრში, დღისით-მზისით, კაფეში, როგორც აღმოჩნდა, ევრო-ნაცების წევრი ქალბატონი იმყოფებოდა, რომელსაც ვიცნობ და მოვიპატიჟებდი სუფრაზე, იქ რომ ყოფილიყო.

მგონი, ეს იყო ორი თვის წინ და რომ გითხრათ, რაზე ვსაუბრობდი, არ მახსოვს. ამ სისულელეზე თუ კომენტარს გავაკეთებ, გეტყვით, რომ საერთოდ არ იდგა არანაირი არჩევნები ბორდის, მით უმეტეს, იანვრის თვეში. მეტსაც გეტყვით, შეუძლებელიც იყო ასეთ სისულელეზე გველაპარაკა, თითქოს ჩემი მეგობრები მეუბნებოდნენ, მე უნდა მომეხდინა ბორდზე ზეგავლენა ზაზა შათირიშვილის არჩევის მიზნით. ბორდი არ ირჩევს ამას, მეორეც – არანაირად არ გვეხება არც ერთ იქ შეკრებილ ადამიანს ამ საკითხის ასე გარჩევა. არ ვიცი, ეს პოლიტიკური თუ თანამდებობრივი ბრძოლის ერთ-ერთი ფორმაა.

არ მგონია, რომ ქართული ჟურნალისტიკის დღევანდელი დონე ეს იყოს, რომ გამოაქვეყნონ ფოტო და დააწერონ – საიდუმლო შეხვედრა და სკანდალური ფოტო. მაინტერესებს, საიდუმლო შეხვედრა ან სკანდალურობა რაში გამოიხატება, მაგრამ ჩვენ მზად უნდა ვიყოთ, ასეთი რამე ხშირად მოხდება“,- განაცხადა მაღლაფერიძემ.