საპარლამენტო უმრავლესობის ლიდერის არჩილ თალაკვაძის განცხადებით „ქართულმა ოცნებამ“ საპრეზიდენტო კანდიდატზე შიდა კონსულტაციები დაიწყო, მისი განცხადებით საბოლოოდ განხილვა პოლიტ საბჭოს ფორმატში გადაინაცვლებს:

„ყველა შესაძლო კანდიდატთან მიმართებაში მიმდინარეობს განხილვა. ამიტომ დაველოდოთ სანამ ეს კონსულტაციები გადაინაცვლებს პოლიტსაბჭოს ფორმატში და პოლიტსაბჭოს ფორმატში იქნება უკვე ჩვენი პარტიის საბოლოო გადაწყვეტილება მიღებული. ქალ კანდიდატებს აქვთ თანაბარი შანსები საპრეზიდენტო კანდიდატად წარდგენის,“-განაცხადა არჩილ თალაკვაძემ.

გავრცელებული ინფორმაციით, მმართველი გუნდში საპრეზიდენტო კანდიდატებად თეა წულუკიანს და სალომე ზურაბიშვილს განიხილავენ.

ინფორმაციის გადამოწმების მიზნით "ნიუპოსტი" სალომე ზურაბიშვილის პრესსამსახურს ესაუბრა, ზურაბიშვილის თქმით ის "არაოფიციალურ ინფორმაციაზე კომენტარს არ აკეთებს."

ინფრასტრუქტურის მინისტრმა ზურაბ ალავიძემ განაცხადა, რომ ის მსგავს კონსულტაციებს არ დასწრებია:

„ზოგადად, ძალიან ძლიერი კანდიდატები არიან. რა თქმა უნდა ქალ პრეზიდენტსაც მივესალმები. თუმცა განხილვებში მონაწილეობა მე არ მიმიღია. ჩემი ინფორმაციით ჯერ განხილვები არ მიმდინარეობს,“-განაცხადა ზურაბ ალავიძემ.

საქართველოს ფინანსთა მინისტრი მამუკა ბახტაძე კი აცხადებს, რომ საპრეზიდენტო კანდიდატთან მიმართებით მმართველი გუნდის შიგნით კონსულტაციები ჯერ არ დაწყებულა.