„ვდგამთ კონკრეტულ ნაბიჯებს, რომ პოლიციელთა სოციალური უზრუნველყოფა იყოს მაღალი და ხარისხიანი“

„ვდგამთ კონკრეტულ ნაბიჯებს, რომ პოლიციელთა სოციალური უზრუნველყოფა იყოს მაღალი და ხარისხიანი“ - გიორგი გახარია

პოლიტიკა - 23:17, 04 Mar, 2018

2048

შინაგან საქმეთა მინისტრი, გიორგი გახარია გადაცემაში „ახალი კვირა“ სამინისტროში მიმდინარე რეფორმებზე და საზოგადოებისთვის აქტუალურ თემებზე საუბრობს.

მინისტრის თქმით, იდგმება კონკრეტული ნაბიჯები პოლიციელთა სოციალური უზრუნველყოფისა და მათთვის ხარისხიანი სოციალური გარანტიებისათვის.

“დღეს პოლიციელის ხელფასი დაახლოებით 800 ლარია, რამდენად ადეკვატურია ეს ხელფასი მათ სამუშაოსთან ადეკვატურობაში? რა თქმა უნდა, არაადეკვატურია, და არ შეიძლება იყოს 800 ლარი ადეკვატური ხელფასი ადამიანისთვის, რომელიც კეთილსინდისიერად ასრულებს თავის მოვალეობას და პასუხისმგებელია მეორე მოქალაქის სიცოცხლეზე, უსაფრთხოებაზე და ჯანმრთელობაზე.

თავიდანვე შინაგან საქმეთა სამინისტროში რეფორმების ძირითადი მიზანი გახლდათ სამოქალაქო კომპონენტში ოპტიმიზაცია, რომელიც ფაქტობრივად უკვე განხორციელების ეტაპზეა და მინდა გითხრათ რომ დახლოებით 400 ასეთი პოზიცია არის შემცირებული.

ეს არ არის მხოლოდ ხელფასის ეკონომია, ეს გახლავთ ამ პოზიციებთან დაკავშირებული ავტორტანსპორტის საწვავი და ასე შემდეგ. მიზანი გახლავთ ძალიან მარტივი, რომ ის ეკონომია ოპტიმიზაციის ხარჯზე რომელსაც ჩვენ ვაკეთებთ სამოქალაქო თანამდებობებზე გადმომისამართებული იყოს საპოლიციო მიმართულებით ეს გახლავთ ის რაც ჩენ შეგვიძლია წლევანდელ საბიუჯეტო წელში გავაკეთოთ, თუმცა, იქ სადაც უფრო მაღალ რისკებს ვხედავთ და სადაც არის განსაკუთრებით უსამართლო სხვაობა ანაზღაურებას შორის, ჩვენ უკვე გარკვეულ ნაბიჯებს ვდგამთ იმისთვის, რომ ჩვენი თითოეული პოლიციელის სოციალური უზრუნველყოფა და სოციალური გარანტიები იყოს უფრო ხარისხიანი და უფრო მაღალი, თუმცა მოგეხსენებათ, რომ სოციალური გარანტიების ძირითადი კომპონენტი არ არის მხოლოდ ხელფასი. ჩვენ ამას უფრო კომპლექსურად ვუდგებით და ვთვლით, რომ ეს არის ადამიანური რესურსების მართვის ერთ- ერთი კომპონენტი და სოციალური დაცვის გარანტიების ის პროგრამები, რომლებიც უახლოეს პერიოდში განხორციელდება შსს-ში იქნება მიმართული სწორედ ჩვენი პოლიციელების სოციალური დაცვის მიმართულებით“ - განაცხადა გიორგი გახარიამ.