არჩილ ტატუნაშვილის მკვლელობა - ესპანეთის საგარეო უწყება მარიონეტული რეჟიმისგან გამოძიებას ითხოვს

პოლიტიკა - 11:02, 02 Mar, 2018

1764

ოკუპირებულ ცხინვალში საქართველოს მოქალაქის, არჩილ ტატუნაშვილის გაურკვეველ ვითარებაში მკვლელობას, ესპანეთის საგარეო საქმეთა სამინისტრო ეხმაურება და მარიონეტულ რეჟიმს, გამჭვირვალე გამოძიების ჩატარებისკენ მოუწოდებს.

ამის შესახებ განცხადება, საგარეო უწყების თვითერზე ვრცელდება.

„ესპანეთის მთავრობა ელოდება, რომ სამხრეთ ოსეთის დე ფაქტო ხელისუფლება ამომწურავ და გამჭვირვალე გამოძიებას ჩაატარებს საქართველოს დაკავებული მოქალაქის გარდაცვალების საქმეზე . ჩვენ კიდევ ერთხელ ვადასტურებთ საქართველოს სუვერენიტეტისა და ტერიტორიული მთლიანობისადმი სრულ მხარდაჭერას“ - ნათქვამია ესპანეთის საგარეო უწყების განცხადებაში.

შეგახსენებთ, არჩილ ტატუნაშვილი 22 თებერვალს, დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის გულის შეტევით გარდაიცვალა. საოკუპაციო რეჟიმის განცხადებით დაკავებულმა ტატუნაშვილმა სინასწარი დაკავების იზოლატორში გადაყვანისას თანმხლებ სამართალდამცავებს წინააღმდეგობა გაუწია და იარაღის წართმევა სცადა, რის გამოც მის წინააღმდეგ გამოყენებული იქნა ფიზიკური ძალა და სპეციალური საშუალებები, რის გამოც ტატუნაშვილმა წონასწორობა დაკარგა და კიბეზე დაეცა, მიღებული დაზიანებების გამო ის ცხინვალის საავადმყოფოში გადაიყვანეს სადაც გულის პრობლემების გამო გარდაიცვალა.