"შინაგან საქმეთა სამინისტროს რას უშვებით? ოცნების მონა უნდა გახდეს?"- ხოშტარია ბორჯომის ამბებს დემოკრატიაზე დარტყმად აფასებს

პოლიტიკა - 14:36, 01 Mar, 2018

1583

რეგიონული პოლიტიკისა და თვითმმართველობის კომიტეტის სხდომაზე განხილვის ერთ-ერთი მთავარი თემა ბორჯომის საკრებულოს ირგვლივ განვითარებული მოვლენები იყო. “ევროპული საქართველოს“ ერთ-ერთმა ლიდერმა ელენე ხოშტარიამ ბორჯომის საკრებულოში მიმდინარე პროცესები დემოკრატიაზე დარტყმად შეაფასა და განაცხადა, რომ ხელისუფლება წაგებას ვერ ეგუება და შედეგების შეცვლას ახლა ძალადობით ცდილობს:

„უნდა მისცეთ თქვენ აქტივისტებს მითითება, რომ არჩევნების შედეგები არ უნდა შეცვალონ ძალადობით, არავის არ მოწონს არჩევნების წაგება, მაგრამ ჩვენ თუ გვინდა გვქონდეს ნორმალური ქვეყანა, არ შეიძლება ძალადობას მიმართო, საბოტაჟი მოუწყო საკრებულოს, პოლიციას მისცე მითითება, რომ ხელია არ გაანძრიოს და ტყვეობაში მყოფ საკრებულოს თავმჯდომარეს უყუროს. მიეცით შინაგან საქმეთა სამინისტროს მითითება, რომ წესრიგი დაამყაროს საკრებულოში. აქ საკრებულოში დეპუტატებს არ გვიშვებდნენ, შეიძლება რაღაც ქნათო, შეიძლება კი არა ამ წუთებშიც შვებიან და არ უშვებენ საკრებულოს თანამშრომლებს შენობაში. სწორედ იმაზე უნდა ვიმსჯელოთ რა დღეშია ჩვენი თვითმმართველობა, როდესაც იმიტომ რომ წაგება არ მოსწონთ, ძალადობას მიმართეს და რა საგანზე? ხელფასი მოგვიმატეო. ის კი არა ბორჯომი ავაყვავოთ და ხალხს რამე ვუშველოთ, არა, ხელფასი მინდა მეტიო. ძალიან სერიოზული პრობლემაა, როდესაც ერთ ადგილზე წაგებული არჩევნები, დემოკრატიის ასეთ დარტყმას იწვევს. ამიტომ აქ საჭიროა პოლიტიკური შეფასებაც და კონკრეტული ზომების მიღებაც.

დემოკრატიულად ვიკამათოთ და არა მუშტებით, როგორ შეიძლება პარლამენტის წევრს ვიღაცა იქ ურტყამდეს, არანაირი კავშირი არ მაქვს ნაციონალურ მოძრაობასთან და საშინელ კონფრონტაციაში ვართ, მაგრამ შეიძლება რომ პარლამენტის წევრს ურტყამდეს ვინმე. ეს ჩვენი დემოკრატიის და პარლამენტის პრესტიჟია, ეს ქმედება ინსტიტუტებზე დარტყმაა და შინაგან საქმეთა სამინისტროს რას უშვებით? ოცნების მონა უნდა გახდეს? მე მცხვენია, როდესაც პოლიციელი იღებს დავალებას, რომ როდესაც ძალადობა ხდება განზე გავიდეს.“- განაცხადა ელენე ხოშტარიამ.