ტატუნაშვილის მკვლელობა - ცხინვალის მარიონეტული რეჟიმი ქართული მხარისა და საერთაშორისო ლიდერების განცხადებებს პროვოკაციულს უწოდებს

პოლიტიკა - 13:03, 01 Mar, 2018

1649

ოკუპირებული სამხრეთ ოსეთის ე.წ. საგარეო საქმეთა სამინისტროში აცხადებენ, რომ ანტიოსურმა ბაკქანალიამ, რომელიც ტატუნაშვილის გარდაცვალებას საქართველოში მოჰყვა, რეკორდულ ნიშნულს მიაღწია.

მარიონეტული რეჟიმი, ტატუნაშვილის მკვლელობაზე რეაქციებს, ქართველი პოლიტიკოსების მიერ „მგრძნობიარე თემების უსინდისოდ გამოყენებას“ უწოდებს, იცავს საკუთარ "პატრონს" - რუსეთს, ხოლო საერთაშორისო ორგანიზაციების ლიდერთა განცხადებებს - პროვოკაციულად აფასებს.

„მაშინ როდესაც, ქართული საზოგადოების ერთი ნაწილი სიმშვიდის შენარჩუნებისა და სიტუაციის საღად შეფასებისკენ მოუწოდებს, მეორე ნაწილი უსინდისიდ იყენებს ამ საკმაოდ მგრძნობიარე თემას საქართველოს შიდაპოლიტიკურ ბრძოლაში საკუთარი რეიტინგის ასამაღლებლად“ - ნათქვამია მარიონეტული რეჟიმის ე.წ. საგარეო უწყების განცხადებაში.

ე.წ. საგარეო უწყების განცადებაში აღნიშნულია, რომ განსაკუთრებით თვალშისაცემია ქართულ პოლიტიკურ ლექსიკონში, დავიწყებული ექსტრემისტული მოწოდებიბის დაბრუნება, რაც იმის ნათელი მაგალითია, რომ სამხრეთ ოსეთის წინააღმდეგ აგრესიულ რევანშიზმს პოლიტიკური დღის წესრიგი არასოდეს დაუტოვებია.

„მიმდინარე მოვლენებს ჩვენ ვაფასებთ, როგორც თანამედროვე ქართული საზოგადოების მდგომარეობის ობიექტურ მაჩვენებელს და სამხრეთ ოსეთისადმი და მისი მაცხოვრებლებისადმი მათ რეალურ განწყობას. გაჩაღებულმა ანტიოსურმა ბაკქანალიამ რეკორდულ ნიშნულს მიაღწია. ტატუნაშვილის საქმეზე რეაციამ ყველაფერს თავისი ადგილი მიუჩინა. დღეს საქართველოში კეტავენ გზებს, ღიად ემუქრებიან სამხრეთ ოსეთსა და აფხაზეთს, აგრძელებენ რუსეთის მისამართით აბსოლუტურად აბსურდულ ბრალდებებს “ოკუპაციასთან“ დაკავშირებით და მოუწოდებენ ეკონომიკური სანქციების დაწესებისკენ, როგორც სამხრეთ ოსეთის ასევე სხვა მეზობელი სახელმწიფოების წინააღმდეგ,“ - ნათქვამია განცხადებაში.

ე.წ. საგარეო უწყება აცხადებს, რომ ფართო ისტერიის ფონზე, რიგი სახელმწიფოებისა და საერთაშორისო ორგანიზაციების ლიდერები, მათ შორის ჟენევის დისკუსიებში მონაწილეები, განაგრძონებ „შეშფოთებას“ ტატუნაშვილის გარდაცვალებასთან დაკავშირებით და სიტუაციის პროვოცირებას განაგრძობენ.