სახელმწიფო დეპარტამენტის წარმომადგენელმა ჰედერ ნაუერტმა განაცხადა, რომ “ამერიკის შეერთებული შტატები ღრმადაა შეშფოთებული 22 თებერვალს, რუსეთის მიერ ოკუპირებულ სამხრეთ ოსეთში საქართველოს მოქალაქის, არჩილ ტატუნაშვილის გარდაცვალებით, მისი დაკავების და დაპატიმრების დროს.”

როგორც "ამერიკის ხმა " იტყობინება, ნაუერტმა, შეერთებული შტატების სახელით, ტატუნაშვილის ოჯახს სამძიმარი გამოუცხადა.

მან ასევე დასძინა, რომ ამერიკა შეშფოთებას გამოთქვამს საქართველოს სხვა მოქალაქეების, ლევან კუტაშვილის და იოსებ პავლიაშვილის დაპატიმრებასთან დაკავშირებით და მოითხოვს, რომ მათ “მიეცეთ საშუალება თავისუფლად გადაკვეთონ ადმინისტრაციული საზღვარი.”

“შეერთებული შტატები მოითხოვს ტრაგიკული ინციდენტის სრულ განმარტებას და მოუწოდებს მხარეებს შეთანხმდნენ დამატებით ზომებზე რეგიონში ურთიერთნდობის და გამჭვირვალობის გასაძლიერებლად” - განაცხადა სახელმწიფო დეპატრამენტის წარმომადგენელმა.

შეგახსენებთ, არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის გულის შეტევით გარდაიცვალა. საოკუპაციო რეჟიმის განცხადებით დაკავებულმა ტატუნაშვილმა სინასწარი დაკავების იზოლატორში გადაყვანისას თანმხლებ სამართალდამცავებს წინააღმდეგობა გაუწია და იარაღის წართმევა სცადა, რის გამოც მის წინააღმდეგ გამოყენებული იქნა ფიზიკური ძალა და სპეციალური საშუალებები, რის გამოც ტატუნაშვილმა წონასწორობა დაკარგა და კიბეზე დაეცა, მიღებული დაზიანებების გამო ის ცხინვალის საავადმყოფოში გადაიყვანეს სადაც გულის პრობლემების გამო გარდაიცვალა.