არჩილ ტატუნაშვილის მკვლელობის საქმეზე საპარლამენტო უმრავლესობა რეზოლუციას ამზადებს

პოლიტიკა - 10:25, 27 Feb, 2018

1029

ცხინვალის ციხეში ქართველი სამხედროს აღცილ ტატუნაშვილის გაურკვეველ ვითარებაში გარდაცვალებასთან დაკავშირებით საპარლამენტო უმრავლესობა რეზოლუციას ამზადებს.

უმრავლესობის მიერ მომზადებული რეზოლუციის მთავარი მოთხოვნა მომხდარის ობიექტური და სწრაფი გამოძიება იქნება. მმართველი გუნდი, ოკუპირებულ რეგიონებში საერთაშორისო დამკვირვებლების შეშვებასაც მოითხოვს.

„ახლახანს მომხდარი ტრაგიკული ფაქტიც იმის დასტურია, რომ მძიმეა ოკუპაციის შედეგები, ამიტომ ჩვენ ყველამ, რა თქმა უნდა უმრავლესობამ პირველ რიგში და რა თქმა უნდა თუკი ამ საკითხს შემოუერთდება უმცირესობა ეს იქნება კარგი. ჩვენ უნდა დავაფიქსიროთ ჩვენი პოზიცია, ჩვენ უნდა გავაცნოთ საერთაშორისო საზოგადოებას. ჩვენი მოთხოვნა იყო და რჩება დამკვირვებლების შეშვება ოკუპირებულ ტერიტორიებზე,“-განაცხადა საპარლამენტო უმრავლესობის წევრმა დავით მათიკაშვილმა.

ოპოზიცია ფიქრობს, რომ ინიციატივა დაგვიანებულია, თუმცა საკითხის მნიშვნელობიდან გამომდინარე რეზოლუციის პროექტს მხარს დაუჭერს.

„ასეთი მოქმედებები სამწუხაროდ დაგვიანებულია, მაგრამ გასაკეთებელია. ამას მოვუწოდებთ ჩვენ ხელისუფლებას ამდენი ხნის განმავლობაში და თუ შესაბამისად ასეთი ტექსტი იქნება, რა თქმა უნდა მხარს დავუჭერთ,“-აცხადებს ენმ-ს წევრი გიორგი ბარამიძე.